Last Updated on 19/08/2026 by Anisa
Hetuesit ukrainas kundër korrupsionit kanë nisur të mërkurën një operacion të gjerë ndaj një organizate të dyshuar kriminale, ku dyshohet se janë të përfshirë deputetë aktualë dhe ish-deputetë, si dhe zyrtarë të lartë të administratës presidenciale të Volodymyr Zelenskyt.
Byroja Kombëtare Kundër Korrupsionit të Ukrainës (NABU) dhe Prokuroria Speciale Kundër Korrupsionit (SAPO) thanë se operacioni synon zbulimin e një “organizate kriminale” që dyshohet se drejtohej nga një deputet aktual dhe një ish-deputet, me përfshirjen e zyrtarëve të lartë të administratës presidenciale.
Sipas mediave ukrainase, kontrolle janë kryer në ambiente të lidhura me Iryna Mudra, zëvendësdrejtoreshë e zyrës së presidentit dhe përgjegjëse për çështjet ligjore dhe reformën në drejtësi, si dhe me deputetin Vadym Stolar.
Autoritetet nuk kanë bërë ende publike identitetet e të gjithë personave nën hetim apo akuzat konkrete ndaj tyre, duke thënë se detaje të tjera do të publikohen më vonë. Operacioni, i koduar “Forest Gump”, është hetimi më i fundit i profilit të lartë për korrupsion që prek administratën e Zelenskyt.
NABU ka publikuar gjithashtu fragmente të bisedave të përgjuara, pa identifikuar personat që flasin. Në regjistrime duket se diskutohen mënyra për regjistrimin e pasurive në emër të fëmijëve, si dhe përmendet zyra presidenciale. Hetimi zhvillohet në një kohë kur NABU dhe SAPO po hetojnë disa raste të dyshuara korrupsioni në nivelet më të larta të politikës ukrainase.