Një nga dëshmitë më të hershme britanike për shpalljen e pavarësisë së Shteteve të Bashkuara do të ekspozohet për publikun në Muzeun Kombëtar Detar në Londër, në kuadër të 250-vjetorit të këtij momenti historik.
Bëhet fjalë për dy dokumente të rralla: një kopje e shkruar me dorë e Deklaratës së Pavarësisë, e datës 4 korrik 1776, si dhe një letër shoqëruese e datës 10 korrik 1776. Këto materiale u dërguan nga zëvendësadmirali Molyneux Shuldham drejt John Montagu, Konti i Katërt i Sandwich-it, duke informuar autoritetet britanike për zhvillimet në kolonitë amerikane.
Sipas Ruth MacLeod, menaxhere e arkivës dhe bibliotekës në Royal Museums Greenwich, data e letrës shoqëruese sugjeron se ky mund të jetë raporti më i hershëm që mbërriti në Britani për shpalljen e pavarësisë. Ajo shpjegon se një tjetër kopje e ngjashme në Mbretërinë e Bashkuar mban datën 11 korrik dhe përmend se kishte humbur anijen postare, çka e bën këtë dokument edhe më të hershëm në mbërritje.
Dokumentet hedhin dritë mbi rrjetet efektive të spiunazhit të kohës, duke treguar se informacioni mbi shpalljen e pavarësisë u sigurua dhe u transmetua brenda pak ditësh nga brigjet amerikane drejt flotës britanike të pozicionuar pranë Nju Jorkut.
Ekspozita do të hapet më 15 qershor dhe do të jetë e aksesueshme falas për vizitorët deri në fund të shtatorit, duke ofruar një pasqyrë të rrallë mbi momentet e para të reagimit britanik ndaj lindjes së Shteteve të Bashkuara.
Kjo ngjarje përkujton një nga momentet më të rëndësishme në historinë botërore, duke sjellë më pranë publikut dokumente që dëshmojnë për tensionet dhe zhvillimet që çuan në krijimin e një shteti të ri./mxh