Last Updated on 14/08/2026 by EL
Kjo e premte ka sjellë një prej lëvizjeve më të mëdha financiare në futbollin e sotëm. Çfarë përflitej prej ditësh si një “sekret i hapur” tashmë është bërë zyrtare: Liverpool FC ka shitur një pjesë të aksioneve të tij te një konsorcium miliarderësh, ku përfshihen emrat më të fuqishëm të teknologjisë globale.
Kompania mëmë e klubit, Fenway Sports Group (FSG), njoftoi se ka arritur marrëveshjen përfundimtare për kalimin e një pakice aksionesh (rreth 30% të klubit) te konsorciumi 1892 Holdings.
Kush qëndron pas “1892 Holdings”?
Grupi investues drejtohet nga biznesmeni Amit Bhatia (ish-aksionar te Queens Park Rangers dhe dhëndri i miliarderit të çelikut Lakshmi Mittal). Së bashku me të, në këtë sipërmarrje marrin pjesë:
-
Jeff Bezos: Themeluesi i Amazon hyn si investitor kryesor përmes fondit K5 Sports (K5 Global). Pasuria e tij vlerësohet në më shumë se 240 miliardë euro.
-
Eduardo Saverin: Bashkëthemeluesi i Facebook merr pjesë përmes EE Capital. Miliarderi me pasuri prej rreth 28 miliardë eurosh rikthehet te futbolli anglez pas tentativës për blerjen e Chelsea-t në vitin 2022.
-
Trustet e familjes Mittal.
Vizioni i FSG dhe deklaratat zyrtare
Pavarësisht hyrjes së konsorciumit të ri, FSG do të ruajë kontrollin operativ dhe shumicën e aksioneve të klubit.
Mike Gordon, Kryetar i FSG, u shpreh:
“Liverpooli është ndërtuar gjithmonë me një vizion afatgjatë, duke marrë vendime në interes të ardhmes së klubit. Kur u shqyrtua kjo mundësi, ishte e qartë se Amit dhe konsorciumi ndanin filozofinë tonë. Përvoja dhe perspektiva e tyre do të plotësojnë themelin e fortë që kemi ngritur.”
Nga ana tjetër, klubi theksoi se ky hap strategjik synon bashkimin e ekspertizës nga sektori i biznesit, teknologjisë dhe investimeve globale për të mbështetur rritjen afatgjatë të Liverpoolit në elitën e futbollit botëror./ET