Shumë njerëz priren të analizojnë çdo detaj të marrëdhënies së tyre, duke i dhënë rëndësi edhe situatave krejt të zakonshme. Një ndryshim humori, dëshira për të qëndruar vetëm apo mungesa e energjisë mund të interpretohen si shenja se diçka nuk shkon në çift.
Psikologia Dr. Orna Guralnik, e njohur nga dokumentari televiziv “Couples Therapy”, ka ndarë tetë situata që shpesh shkaktojnë shqetësim të panevojshëm, megjithëse janë pjesë normale e një marrëdhënieje.
Sipas saj, bindjet që krijojmë nga përvojat e mëparshme, fëmijëria dhe ndikimi i rrjeteve sociale mund të na bëjnë t’i keqinterpretojmë situatat dhe të pengojmë krijimin e një lidhjeje më të shëndetshme.
1. Partneri nuk është gjithmonë në humor të mirë
Askush nuk mund të jetë gjithmonë i qeshur, energjik dhe i vëmendshëm. Gjendja emocionale ndryshon, ashtu si edhe energjia dhe përqendrimi ynë.
Problemet në punë, shqetësimet familjare apo lodhja mund të ndikojnë në sjelljen e partnerit, pa nënkuptuar domosdoshmërisht se ka diçka që nuk shkon në marrëdhënie.
2. Një ditë ndiheni shumë të afërt, ditën tjetër më të largët
Çdo marrëdhënie kalon nëpër periudha të ndryshme. Ka ditë kur komunikimi është i shkëlqyer dhe ndiheni më të lidhur se kurrë, por edhe momente kur bisedat janë më të pakta dhe secili është i përqendruar te vetja.
Këto luhatje janë normale dhe nuk nënkuptojnë automatikisht se po largoheni nga njëri-tjetri.
3. Partneri kalon një periudhë të vështirë emocionale
Kur partneri është i mërzitur apo nuk ndihet mirë, mund të lindë dëshira për ta zgjidhur menjëherë problemin. Por jo çdo gjendje e keqe emocionale lidhet me marrëdhënien.
Ndonjëherë njeriu thjesht ka nevojë për kohë që të përballojë atë që po kalon, pa qenë e nevojshme që partneri të ndërhyjë.
4. Keni nivele të ndryshme energjie
Njëri mund të dëshirojë të dalë, të takohet me miqtë dhe të bëjë aktivitete, ndërsa tjetri mund të preferojë të qëndrojë në shtëpi dhe të pushojë.
Kjo nuk do të thotë se nuk përputheni. Për sa kohë që respektoni nevojat e njëri-tjetrit dhe gjeni një ekuilibër, ndryshimet në energji nuk janë domosdoshmërisht problem.
8 gjëra normale që mund të jesh duke i keqinterpretuar si flamuj
5. I justifikon sjelljet e paqarta të partnerit
Një mesazh pa përgjigje të menjëhershme apo një koment i keqkuptuar nuk duhet të interpretohet menjëherë si mungesë respekti apo interesi.
Psikologët këshillojnë të mos nxjerrim përfundime negative pa pasur arsye të qarta. Të supozosh fillimisht qëllime të mira mund të shmangë shumë keqkuptime dhe konflikte të panevojshme.
6. Keni nevojë të kaloni kohë veçmas
Të qenit në një lidhje nuk do të thotë të kaloni çdo moment bashkë. Disa njerëz kanë nevojë për më shumë kohë vetëm për t’u çlodhur dhe për të rifituar energjinë.
Kjo nevojë ndryshon nga një person tek tjetri dhe nuk duhet interpretuar si mungesë dashurie apo dëshirë për t’u larguar nga partneri.
7. Falënderoni njëri-tjetrin edhe për gjërat e vogla
Shprehja e mirënjohjes për gjërat e përditshme është një pjesë e rëndësishme e marrëdhënies. Një falënderim për përgatitjen e darkës, ndihmën në shtëpi apo një gjest të vogël mund ta bëjë partnerin të ndihet i vlerësuar.
Kjo nuk është shenjë formaliteti apo distance, por një mënyrë për të treguar respekt dhe vëmendje.
8. Flini më mirë në shtretër të ndryshëm
Jo të gjithë flenë rehat kur ndajnë të njëjtin shtrat. Lëvizjet gjatë natës, gërhitja apo zakonet e ndryshme të gjumit mund të ndikojnë në cilësinë e pushimit.
Për disa çifte, fjetja në dhoma të ndara është një zgjidhje që i ndihmon të pushojnë më mirë. Kjo nuk do të thotë domosdoshmërisht se marrëdhënia ka probleme./mxh