Last Updated on 01/02/2025 by adminfjala
Pavarësisht çmimeve simbolike, fuqia blerëse në tregun rom të Gjirokastrës ka rënë ndjeshëm, duke e vështirësuar edhe më tej mbijetesën e këtij komuniteti. Për shumë tregtarë rom, ky është i vetmi burim të ardhurash, një mundësi punësimi që tashmë mezi siguron të ardhura minimale.
“Nuk ka më blerje si më parë. Edhe ata që vinin për gjëra të lira, sot nuk kanë mundësi të shpenzojnë. Fitimi ynë ditor është vetëm 300-400 lekë, sa për të mbijetuar,” thonë tregtarët, të cilët vazhdojnë të përballen me një realitet të vështirë ekonomik.
Tregu funksionon mbi një zallishte të hapur në lagjen periferike të Gërhotit, ku mungojnë kushtet bazë për të zhvilluar një aktivitet normal. Në rastet e reshjeve të dendura, hapësira përmbytet, duke e bërë të pamundur tregtimin. Ndërkohë, mungesa e infrastrukturës minimale, përfshirë tualetet publike, e rëndon edhe më shumë situatën.
Bashkia e Gjirokastrës është duke hartuar një plan për krijimin e një tregu të përshtatshëm, një hapësirë të dedikuar për këtë treg, por ende nuk dihet koha e zbatimit të këtij projekti.
Gjendja e tregut reflekton realitetin e vështirë të komunitetit rom në Shqipëri, ku rreth 70% e popullsisë mbështetet në këtë lloj tregtie për mbijetesë. Për ta, ky treg nuk është thjesht një mundësi biznesi, por një luftë e përditshme për të siguruar bukën e gojës./k.k