Të gjesh drogë në Tiranë nuk duhet të jetë aspak e vështirë. Gjatë viteve të fundit, edhe zona e Kamëz është kthyer si bazë për shpërndarjen e lëndës narkotike. Shefi i sektorit kundër trafiqeve dhe narkotikëve në Policinë e Tiranës, Arbër Zemani tregon në një prononcim për A2CNN zonat më problematike se ku shitet më shumë drogë.
“Zonat më problematike të shpërndarjes së lëndëve narkotike në Tiranë kryesisht janë ato zona që kanë qenë edhe në vitet e mëparshme. Si zona e ish-Shkollës së Bashkuar, Kombinati, zona e Ali Demit, Tirana e Re.
Në Kamëz janë vënë re vitet e fundit goxha goditje të shpërndarjes së lëndëve narkotike. Dhe pa diskutim mbetet zona e ish-Bllokut, ku kryesisht shpërndahet në lokalet e natës, në orët e vona të tyre”, tha Arbër Zemani, shef i trafiqeve dhe Antidrogës, Tiranë.
Kokaina mban vendin e parë si droga që përdoret më shumë nga të rinjtë. Pasohet nga ekstazia dhe kanabisi me përqindje të lartë, të cilën trafikantët e sjellin me postë nga jashtë në Shqipëri, shkruan A2 CNN.
“Vitet e fundit është vënë re shtimi i rasteve të përdorimit të lëndëve narkotike të llojit kokainë. Për shembull para 10 vitesh përdorej heroina, ndërsa vitet e fundit është shtuar përdorimi i kokainës dhe i kanabis sativës.
Gjithashtu, shtim kanë pasur edhe lëndët sintetike, si ekstazi, MDMA, por kokaina për momentin është droga që përdoret më shumë. Është për tu theksuar edhe rasti i kanabis sativa e cila vjen nëpërmjet postës nga Tajlanda ose nga Shtetet e Bashkuara dhe nga Kanadaja.
Veçantia e kësaj është se kjo drogë ka mjaft treg në Tiranë, sepse ka jë cilësi të lartë dhe shitjen e ka goxha të lartë. Në treg i afrohet shitjes së kokainës. Një qese me deri në 4 gramë shkon deri në 100 euro”, tha Arbër Zemani, shef i antidrogës, Tiranë.
Por si veprojnë anëtarët e grupeve kriminale në terren? Mënyra më e shpejtë dhe më e preferuar e tyre është përdorimi i monopatinave, si dhe taksistët që punojnë në të zezë.
“Në pjesën më të madhe të rasteve veprojnë sipas zonave. Në një zonë të caktuar mund të ketë bashkëpunim deri në 5 persona. Por ka raste që shitja bëhet edhe nga një person i vetëm. Dhe në këto raste këta persona shpërndajnë duke përdorur monopatina, motora, biçikleta ose dhe taksi”, tha Zemani.
Në operacionin e fundit ku u lëshuan 34 urdhër arreste, 5 prej tyre ishin taksistë të paliçensuar të cilët punën e tyre e kishin kamufluar për të shpërndarë drogë në Tiranë./ S,M
