Drejtuesi politik i Tiranës për Partinë Demokratike, Belind Këlliçi, foli rreth procesit të primareve të zhvilluara të dielën.
I ftuar në Syri Tv, Këlliçi tha se primaret ishin një proces unik për nga organizimi, ndërsa pati një interes të lartë nga anëtarët e PD për të votuar.
Këlliçi shtoi ndër të tjera se Partia Demokratike është partia e rebelëve kundër sistemit.
“Në primaret e PD, shqiptarët panë një proces që nuk e kishin parë asnjëherë më parë. Panë një proces që është unik për nga organizimi, prodhoi një interes të jashtëzakonshëm. Mbi 50,800 anëtarë të PD, dolën për të votuar. Në Tiranë ka patur një shifër rekord pjesëmarrje, 13 mijë e 50 votues në mos gaboj. Një interes shumë të madh për të marrë pjesë, për të votuar dhe fuqizuar anëtarësinë. Diçka që ishte premtuar në Kuvendin e Rithemelimit në dhjetor të vitit 2021 dhe që u bë realitet këtë fundjavë.
Hera e dytë që ndodhi, sepse hera e parë ishte në vitin 2023 për përzgjedhjen e kandidatëve për pushtetin lokal dhe kësaj radhe kishte interes shumë të shtuar edhe për shkak se numri i kandidatëve ishte shumë herë më i madh. Duhet thënë që PD, mbetet partia e rebelëve kundër sistemit, që rrëzuan diktaturën dhe njerëzve që janë përherë rebelë në qasjen e tyre”, tha Këlliçi./ S,M
