Një defekt teknik në sistemin e transmetimit të të dhënave në qendrën e radarëve të Milanos (Peschiera Borromeo) ka shkaktuar ndërprerje të menjëhershme të trafikut ajror në pjesën veriore të Italisë, duke prekur mijëra pasagjerë dhe dhjetëra fluturime.
Ngjarja ndodhi mbrëmjen e së shtunës, rreth orës 20:20, kur për shkak të një “ngadalësimi në rrjetin e brendshëm të komunikimit” të njohur si E-Net, u ndalën të gjitha nisjet dhe uljet e avionëve në aeroportet e veriut italian. Për më shumë se tre orë, u vendos masa e quajtur “rateo zero”, që nënkupton ndalimin e çdo lëvizjeje në hapësirën ajrore të zonës.
Cilat aeroporte u prekën?
Ndër më të prekurit ishin aeroportet kryesore si Milano Malpensa, Milano Linate, Bergamo, Torino dhe Genova. Situata ndikoi gjithashtu në aeroportet e Firences, Pizës dhe Romës, që u detyruan të pranojnë fluturime të devijuara.
Sipas të dhënave paraprake, mbi 300 fluturime pësuan vonesa të mëdha – me një mesatare prej rreth 2 orësh – ndërsa disa u anuluan ose u devijuan drejt aeroporteve të tjera.
Reagimi i autoriteteve
Sipas ENAV-it (Agjencia Kombëtare e Shërbimeve të Navigimit Ajror në Itali), defekti nuk kishte të bënte me vetë radarët, por me rrjetin e transmetimit të të dhënave mes qendrave të kontrollit dhe sistemeve të komunikimit me avionët.
Pas ndërhyrjeve teknike, trafiku ajror filloi të rikthehej gradualisht rreth orës 22:15, me rikthimin e plotë të funksionalitetit pak pas orës 23:30.
Zëvendëskryeministri dhe ministri i Infrastrukturës, Matteo Salvini, ka ndjekur situatën nga afër dhe ka kërkuar sqarime të detajuara. Ndërkohë, pritet të nisë një hetim për të zbuluar shkaqet e defektit dhe për të analizuar nëse sistemi ka pasur mangësi në mbrojtjen rezervë ./kb
