Dëshira për t’u larguar nga një aventurë romantike që sapo ka nisur, por që nuk po ju jep atë që prisnit, është shumë më e zakonshme sesa mendoni.
Edhe më e vështirë bëhet kur nuk doni të lëndoni personin tjetër dhe hezitoni të mbyllni situatën, edhe pse e kuptoni qartë se nuk ka të ardhme.
Pikërisht në këtë pikë, shumë zgjedhin opsionin e shpejtë: “ghosting”, pra zhdukjen totale pa shpjegime. Por, sipas terapistes familjare Rachel Thomasian, kjo është mënyra më e dhimbshme për ata që lihen pas, sepse krijon pasiguri dhe pyetje pa përgjigje.
Në një intervistë për revistën Bustle, ajo thekson se mungesa e komunikimit i bën njerëzit të ndihen të pavlerësuar dhe të hutuar
Për të shmangur këtë, ekspertët propozojnë një zgjidhje të re që po bëhet trend: “gjysmë-fantazma”.
Kjo metodë nënkupton një largim të sjellshëm, duke qenë i sinqertë, duke shpjeguar situatën dhe duke vendosur kufij, përpara se komunikimi të ndërpritet përfundimisht.
Sipas psikologëve, nëse po i përgjigjeni mevonesë, po gjeni justifikime për të mos dalë, ose nuk ndiheni më të entuziazmuar për takimet, atëherë interesi ka rënë dhe është momenti për të qenë i ndershëm.
Ekspertët këshillojnë që mënyra e ndarjes të varet nga niveli i njohjes:
-nëse keni folur disa javë ose muaj, më e përshtatshme është një telefonatë,
-në rast se keni qenë vetëm në pak takime, mjafton edhe një mesazh.
Sa më shumë përfshirje emocionale të ketë pasur pala tjetër, aq më e kujdesshme duhet të jetë mënyra e komunikimit.
Si ta thuash?
Nuk keni pse të shpjegoni gjithçka në detaje. Një mesazh i thjeshtë, i sjellshëm dhe i qartë është i mjaftueshëm, si për shembull:
Kalova shumë mirë me ty, por nuk e shoh që kjo të çojë në një lidhje të ardhshme. Të uroj çdo të mirë.
Sipas terapistëve, vendosja e kufijve dhe sinqeriteti i menjëhershëm ndihmon të dy palët të ecin përpara shpejt, pa dramë dhe pa rikthime të panevojshme.
Me pak fjalë: më mirë një e vërtetë e shkurtër, sesa një zhdukje e gjatë./kb