Shqipëria ka hyrë zyrtarisht në atmosferën festive të Pashkëve, teksa besimtarët katolikë po përmbyllin sot ritualet e të Shtunës së Madhe përpara shpalljes së lajmit të madh të Ringjalljes.
Që prej orëve të para të mëngjesit, kishat në mbarë vendin janë mbushur me qytetarë të cilët, sipas traditës së lashtë, kanë dërguar ushqimet për bekim, si një shenjë mirënjohjeje dhe lutjeje për mbarësi, shëndet e begati në vatrat e tyre familjare. Pas përgatitjeve shpirtërore që zgjatën përgjatë shtatë javëve të Kreshmës, kulmi i kremtimeve do të arrijë sonte në mbrëmje në orën 21:45, ku në Katedralen e “Shën Palit” në kryeqytet do të nisë Mesha e Madhe e Vigiljes. Nën udhëheqjen e Arqipeshkvit Metropolit, Imzot Arjan Dodaj, besimtarët do të luten dhe do të presin në dritën e qirinjve mesnatën, momentin simbolik që shënon triumfin e jetës mbi vdekjen.
Kjo ditë e shenjtë pason marshimin prekës të “Udhës së Kryqit” që u mbajt mbrëmjen e djeshme, duke e kthyer këtë fundjavë në një manifestim të fuqishëm të besimit, paqes dhe solidaritetit njerëzor.