Last Updated on 20/04/2026 by EL
Celine Dion është rikthyer me një këngë të re pas një periudhe të gjatë larg skenës. Projekti i saj i fundit mban titullin Dansons dhe vjen pak muaj para rikthimit të saj në skenë me koncerte në Paris.
Kënga është shkruar nga Jean-Jacques Goldman, një bashkëpunëtor i hershëm i artistes. Ajo këndohet në frëngjisht dhe rikthen stilin që e bëri të njohur në fillimet e karrierës.
Projekti shoqërohet edhe me një videoklip, ku shfaqen balerinë dhe çifte që kërcejnë në rrugët e Parisit.
“Dansons” është kënga e parë e saj e re që prej vitit 2019, kur publikoi albumin Courage, i cili arriti sukses të madh në renditjet ndërkombëtare.
Gjatë këtyre viteve, Dion ka qenë më pak aktive për shkak të një problemi shëndetësor, sindromës së personit të ngurtë, që i shkakton spazma muskulore dhe e bën të vështirë performancën në skenë.
Në fund të marsit ajo njoftoi rikthimin me një seri koncertesh në La Défense Arena në Paris. Koncertet do të nisin më 12 shtator dhe do të zgjasin deri më 17 tetor.
Në një mesazh për fansat, këngëtarja u shfaq optimiste dhe tha se po ndihet mirë dhe është rikthyer sërish te muzika dhe performanca./et