Vazhdimi i shumëpritur i filmit ikonik nuk kufizohet vetëm te bota e modës dhe figura e Anna Wintour, por zgjeron goditjen satirike edhe drejt një prej çifteve më të fuqishëm në botë.
Sipas raportimeve të Variety, që citon burime të pranishme në premierën në Lincoln Center dhe në një shfaqje në Londër, personazhi i Emily Blunt ka pësuar një transformim të madh. Emily tani paraqitet si një figurë elegante dhe me ndikim në modë, që punon për Christian Dior dhe ka një ngjashmëri të dukshme me Lauren Sánchez.
Në film, ajo është në një lidhje me një miliarder të teknologjisë, rol i interpretuar nga Justin Theroux. Ky personazh përshkruhet si një kombinim i tipareve të Jeff Bezos dhe Elon Musk, duke reflektuar fuqinë dhe ndikimin e tyre në botën reale.
Një element interesant është rrëfimi për transformimin fizik të këtij miliarderi, i treguar përmes skenave në të kaluarën, ku ai shfaqet ndryshe përpara se të arrinte pasurinë e madhe—një detaj që kujton evolucionin publik të vetë Bezos.
Në të njëjtën kohë, Lucy Liu luan ish-bashkëshorten e tij, një filantrope që i përkushtohet kauzave sociale pas divorcit, një personazh që ngjan me MacKenzie Scott.
Një nga linjat kryesore të historisë përfshin përpjekjen e Emily për të bindur partnerin e saj të blejë “Runway”, revista fiktive që zë vendin e Vogue, duke i bërë jehonë spekulimeve reale për interesin e mundshëm të çiftit Bezos në blerjen e Condé Nast.
Megjithatë, vetë Lauren Sánchez ka hedhur poshtë këto aludime, duke reaguar me humor në një intervistë për New York Times.
Nga ana tjetër, një përfaqësues i Emily Blunt ka mohuar çdo lidhje mes personazhit të saj dhe Sánchez, duke e cilësuar këtë interpretim si të pavërtetë.
Ironikisht, situata bëhet edhe më interesante pasi Jeff Bezos dhe Lauren Sánchez do të bashkëdrejtojnë Met Gala-n e këtij viti, një event i lidhur ngushtë me botën që filmi satirizon. Kjo mund të vendosë aktorët dhe personazhet reale në të njëjtin ambient, duke e bërë vijën mes realitetit dhe trillimit edhe më të paqartë./mxh