Personi i cili ishte i akuzuar se kishte shprehur besnikëri ndaj Shtetit Islamik dhe se kishte planifikuar të sulmonte një nga koncertet e Taylor Swift në Vjenë gati dy vjet më parë, ka pranuar fajësinë në fillim të gjyqit të tij, bën të ditur The Guardian.
Plani u pengua, por autoritetet austriake gjithsesi anuluan tre koncertet e superyllit amerikan në gusht 2024. Fansat e këngëtares, të cilët kishin udhëtuar në Austri nga e gjithë bota për të ndjekur turneun rekord “Eras Tour”, u zhgënjyen shumë, por u organizuan duke e kthyer Vjenën në një hapësirë të madhe për shkëmbim byzylykësh miqësie dhe këndime kolektive.
Mediat austriake Kurier dhe Kronen Zeitung raportuan se i pandehuri pranoi fajësinë për akuzat që lidhen me planin për sulmin në koncert. Nuk është ende e qartë për cilat akuza të tjera ai pranoi fajësinë.
I pandehuri, një shtetas austriak 21-vjeçar i njohur vetëm si Beran A, sipas rregullave të privatësisë në Austri, përballet me akuza për vepra terroriste dhe anëtarësim në një organizatë terroriste. Avokati i tij kishte deklaruar më parë se ai do të pranonte fajësinë për shumicën e akuzave. Ai mund të dënohet deri në 20 vite burg.
21 vjeçari po gjykohet së bashku me Arda K, emri i plotë i të cilit gjithashtu nuk është bërë publik. Sipas akuzave, ata, bashkë me një burrë të tretë, kishin planifikuar sulme të njëkohshme në Arabinë Saudite, Turqi dhe Emiratet e Bashkuara Arabe gjatë Ramazanit në vitin 2024, në emër të IS. Beran A dhe Arda K nuk i realizuan kurrë këto sulme. Vetëm Beran A u akuzua për lidhje me planin ndaj koncertit të Taylor Swift.
Ai dyshohet se kishte planifikuar të sulmonte me thika ose eksplozivë të improvizuar rreth 30,000 njerëz të mbledhur jashtë stadiumit Ernst Happel, ndërsa 65,000 të tjerë ishin brenda stadiumit. Sipas autoriteteve në vitin 2024, ai synonte të “vriste sa më shumë njerëz të ishte e mundur”. SHBA-të siguruan informacione inteligjence që ndikuan në vendimin për anulimin e koncerteve.
Beran A dyshohet gjithashtu se kishte krijuar lidhje me anëtarë të tjerë të IS para sulmit të planifikuar. Prokurorët thonë se ata diskutuan për blerjen e armëve dhe ndërtimin e bombave, dhe se ai u përpoq të blinte armë ilegalisht në ditët para koncertit. Për më tepër, ai kishte bërë betim besnikërie ndaj grupit militant.
Autoritetet kontrolluan apartamentin e tij më 7 gusht 2024 dhe gjetën materiale për ndërtimin e bombave. Koncertet ishin planifikuar të fillonin një ditë më pas.
“Të anulohej seria jonë e koncerteve në Vjenë ishte shkatërruese. Arsyeja e anulimit më mbushi me një ndjenjë të re frike dhe një ndjenjë të madhe faji, sepse shumë njerëz kishin planifikuar të vinin në këto koncerte”, shkroi Swift në një deklaratë në Instagram dy javë më vonë.
Gjyqi po zhvillohet në Wiener Neustadt, rreth një orë në jug të Vjenës.
Prokurorët kanë ngritur gjithashtu akuza për terrorizëm ndaj Arda K në lidhje me planin për sulme të njëkohshme në Arabinë Saudite, Turqi dhe Emiratet e Bashkuara Arabe.
Personi i tretë në këtë plan, Hasan E, dyshohet se plagosi me thikë një roje sigurie në Xhaminë e Madhe në Mekë, Arabinë Saudite, më 11 mars 2024. Ai u arrestua dhe ndodhet ende në paraburgim në Arabinë Saudite.
Beran A dhe Arda K nuk i realizuan planet e tyre në Turqi dhe Emiratet e Bashkuara Arabe. Beran A u kthye në Vjenë dhe më pas dyshohet se filloi të planifikonte sulmin ndaj koncertit të Swift.
Plani në Vjenë u krahasua me sulmin e vitit 2017 nga një kamikaz në koncertin e Ariana Grande në Manchester, Angli, ku u vranë 22 persona. Bomba shpërtheu në fund të koncertit, ndërsa mijëra fansa të rinj po largoheshin, duke u bërë një nga sulmet ekstremiste më vdekjeprurëse në Mbretërinë e Bashkuar në vitet e fundit./mxh