Tajvani ka akuzuar Kinën se është burimi i vetëm i pasigurisë në rajon, pasi udhëheqësi kinez Xi Jinping thuhet se tha se pavarësia e Tajvanit është “e papajtueshme” me paqen.
“Kërcënimi ushtarak i Kinës është burimi i vetëm i pasigurisë në Ngushticën e Tajvanit dhe në rajonin më të gjerë Indo-Paqësor. Përmirësimi i vazhdueshëm i mbrojtjes dhe parandalimi efektiv i përbashkët janë faktorët më kritikë për të siguruar sigurinë rajonale”, tha zëdhënësja e kabinetit, Michelle Lee në përgjigje të një gazetari që e pyeti në lidhje me komentet e Xi-së mbi Tajvanin.
Kundërshtimi i Taipeit erdhi pasi Xi Jinping i tha Presidentit të SHBA-së Donald Trump se Tajvani ishte çështja më e rëndësishme në marrëdhëniet Kinë-SHBA dhe mund të krijonte një situatë shumë të rrezikshme nëse trajtohej keq.
Partia Komuniste e Kinës e pretendon ishullin e vetëqeverisur si territor të vetin dhe është zotuar ta marrë atë një ditë, me forcë nëse është e nevojshme.
“Pavarësia e Tajvanit dhe paqja janë po aq të papajtueshme sa zjarri me ujin. Ruajtja e paqes dhe stabilitetit në të gjithë Ngushticën e Tajvanit është emëruesi më i madh i përbashkët midis Kinës dhe SHBA-së”, raportuan mediat se tha Xi.
Uashingtoni mban marrëdhënie të forta jozyrtare me Tajvanin e qeverisur në mënyrë demokratike. Javën e kaluar Sekretari i Shtetit Marco Rubio tha se nuk duhet të ketë ngjarje destabilizuese në lidhje me Tajvanin në interes të ndërsjellë të të dy vendeve. SHBA-të gjithashtu kanë përsëritur angazhimet e tyre ndaj Tajvanit ditët e fundit. /kb