Kancelari gjerman Friedrich Merz ka vlerësuar atmosferën në samitin e G7 në Evian të Francës, duke theksuar se marrëdhëniet e tij me presidentin amerikan Donald Trump mbeten të mira, pavarësisht mosmarrëveshjeve të fundit lidhur me luftën në Iran.
Duke folur para gazetarëve në ditën e fundit të samitit, Merz e përshkroi dialogun mes liderëve si të hapur dhe konstruktiv. Ai tha se gjatë takimeve u diskutuan të gjitha temat e rëndësishme dhe se bisedimet u karakterizuan nga një frymë e vërtetë bashkëpunimi.
Sipas kancelarit gjerman, nuk pati asnjë temë të ndaluar dhe asnjë moment tensioni personal mes liderëve. Përkundrazi, ai theksoi se ekzistonte një nivel i lartë konsensusi politik për çështjet kryesore që u trajtuan gjatë samitit.
Marrëdhëniet mes Merz dhe Trump kishin nisur pozitivisht vitin e kaluar, por më vonë u ftohën pas kritikave të ashpra që kancelari gjerman adresoi ndaj presidentit amerikan për qëndrimin e tij lidhur me konfliktin në Iran. Pas këtyre përplasjeve politike, Trump njoftoi tërheqjen e 5 000 ushtarëve amerikanë nga Gjermania.
Megjithëse dy liderët nuk zhvilluan një takim dypalësh gjatë samitit të G7, Merz shfrytëzoi rastin për t’i bërë Trumpit një dhuratë simbolike. Presidenti amerikan, i cili festoi ditëlindjen e tij të 80-të të dielën, mori një fanellë të personalizuar të kombëtares gjermane të futbollit, në një gjest miqësor që lidhej me Kupën e Botës.
Deklaratat e Merz synojnë të zbusin spekulimet për një përkeqësim të marrëdhënieve mes Berlinit dhe Uashingtonit, duke treguar se pavarësisht dallimeve në disa çështje ndërkombëtare, bashkëpunimi mes dy aleatëve vazhdon të mbetet i rëndësishëm./mxh