Çmimet e naftës shënuan sot një rritje të fortë duke u ngjitur përkohësisht me rreth 5%, ndërsa investitorët po ndjekin me nervozizëm zhvillimet diplomatike në Lindjen e Mesme.
Tregjet po presin nënshkrimin e një protokolli marrëveshjeje mes Iranit dhe Shteteve të Bashkuara të Amerikës, i planifikuar për të premten, që synon t’i japë fund konfliktit në rajon.
Marrëveshja pritet të çojë në rihapjen e Ngushticës së Hormuzit, një nga korridoret më të rëndësishme detare për transportin global të naftës.
Çdo zhvillim që prek këtë pikë strategjike ka ndikim të menjëhershëm në tregjet ndërkombëtare të energjisë.
Rreth orës 17:20 çmimi i naftës Brent për dorëzim në gusht u rrit me 1,44%, duke arritur në 80,10 dollarë për fuçi, pasi më herët kishte prekur nivelin e afro 83 dollarëve.
Ndërkohë, nafta amerikane WTI për dorëzim në korrik u ngjit me 1,58%, në 77,25 dollarë për fuçi.
Luhatjet e forta tregojnë se investitorët mbeten të pasigurt për mënyrën se si do të zbatohet marrëveshja dhe për ndikimin që ajo mund të ketë në furnizimin global me energji.
Edhe pse një fund i konfliktit do të ishte pozitiv për tregtinë ndërkombëtare, periudha e tranzicionit vazhdon të krijojë paqartësi.
Ngushtica e Hormuzit mbetet një nga pikat më të ndjeshme të ekonomisë globale, pasi përmes saj kalon një pjesë e konsiderueshme e eksporteve botërore të naftës.
Për këtë arsye, çdo sinjal për stabilizim ose tension në rajon reflektohet menjëherë në çmimet e energjisë./mxh