Last Updated on 09/08/2026 by Anisa
Pas zjarrit masiv që rrezikoi Krujën mbrëmjen e së shtunës, deputeti socialist Erion Braçe ka reaguar në rrjetet sociale, duke kërkuar zbatim të rreptë të ligjit për ndalimin e ndezjes së zjarreve, më shumë mbështetje për zjarrfikësit, por edhe duke iu përgjigjur atyre që i cilëson si “cinikët” e Instagramit, të cilët, sipas tij, kanë përdorur situatën për sulme dhe komente politike mbi menaxhimin e zjarrit.
Braçe vlerëson vendimin e qeverisë për pagesën shtesë të zjarrfikësve të angazhuar në operacionet për shuarjen e flakëve, por thotë se mbetet ende punë për t’u bërë.
“Qeveria dha dy javë të shkuara një pagë shpërblim për zjarrfikësit e përfshirë në operacionet e shuarjes së zjarreve. Shumë mirë! Por ama kemi dy gjëra që duhet t’i zgjidhim: raporti mes të ardhurave, pasurive të shpëtuara dhe rrezikshmërisë së punës nuk është ende i shpërblyer sa duhet dhe në ekuilibër; ndërkohë zjarrfikësit duhet të kenë menjëherë normën ushqimore”, shkruan ai.
Deputeti socialist kërkon gjithashtu zbatimin pa përjashtim të ligjit që ndalon ndezjen e zjarreve gjatë sezonit veror.
“Duhet zbatuar ligji. Kaq!”, shprehet Braçe, duke u ndalur më pas tek komentet dhe sulmet që janë bërë në rrjete sociale lidhur me mënyrën si autoritetet u përballën me zjarrin në Krujë dhe konsideruar ato budallallëk e ligësi.
Braçe kujton se, sipas policisë, zjarri u shkaktua nga një banor, i cili është arrestuar, ndërsa u përhap për shkak të erës dhe temperaturave të larta.
“Zjarrin e ndezi një banor. Zjarri u përhap nga kushtet e motit, era dhe i nxehti. Zjarri u shua plotësisht nga zjarrfikësit vendorë dhe ata të Forcave të Armatosura, me çdo mjet në dispozicion, përfshi helikopterë e dronë. Zero dëme në njerëz, zero dëme në banesa. Dëmi mjedisor në bimësi e pemë është i madh.Unë pranoj çdo kritikë në rastin e zjarreve. Por nuk pranoj dot budallallëkun, cinizmin, ligësinë. Sikur dje në Krujë të kishte munguar një zjarrfikës apo një zjarrfikëse, çdo gjë që ka rrjedhur në rrjet do legjitimohej. Por duhet kursyer çdo fjalë e rëndë kur të gjithë ishin në punë”, thotë Braçe.
Mesazhi i plotë i deputetit Erion Braçe:
He mo, pse flet për Krujën?! Se bën opozitarin ti!
Shko shih Krujën sot, sa e pastër është!
Me ato 4.2 milionë euro, zjarri do ishte shuar menjëherë!
Ky është cinizmi i Instagramit me zjarrin e Krujës!
Po e vërteta cila është?
1. Zjarrin e ndezi një banor; i arrestuar ky!
2. Zjarri u përhap nga kushtet e motit; era dhe i nxehti!
3. Zjarri u shua plotësisht nga zjarrfikësit vendorë dhe ata të Forcave të Armatosura – çdo mjet në dispozicion, përfshirë helikopterë, dronë etj.!
4. Zero dëme në njerëz; të gjithë banorët janë shëndoshë e mirë!
5. Zero dëme në banesa; nuk u dogj ndonjë banesë!
6. Dëmi mjedisor në bimësi e pemë është i madh; cilësia e ajrit sot, natyrisht, që nuk është e mirë në Krujë dhe i nxehti e përkeqëson.
Shikoni, unë pranoj çdo kritikë në rastin e zjarreve.
Por nuk pranoj dot budallallëkun, cinizmin, ligësinë!
Ka një fjalë të popullit që vjen e tillë:
Zjarrin mos e ndiz. Po e ndeze, zor se e kontrollon dot!
Kjo është e tillë, kështu, kudo: në Shqipëri, Greqi, Francë, Spanjë, Portugali, Itali, Kanada – në këtë të fundit ka një muaj e më shumë që ka veç zjarre; dje, paralelisht me Krujën, atje evakuoheshin 20 mijë njerëz, edhe pse ata kanë avionë, shumë avionë!
Sikur dje në Krujë të kishte munguar një zjarrfikës apo një zjarrfikëse, çdo gjë që ka rrjedhur në rrjet do të legjitimohej!
Por duhet kursyer çdo fjalë e rëndë kur të gjithë ishin në punë!
Dy gjëra të fundit:
E para, ligji; me ligj kemi që nga 30 marsi në 30 tetor ndalohet të ndizet zjarr për cilëndo arsye; duhet zbatuar ligji! Kaq!
E dyta, Qeveria dha dy javë të shkuara një pagë shpërblim për zjarrfikësit e përfshirë në operacionet e shuarjes së zjarreve; shumë mirë! Por ama kemi dy gjëra që duhet t’i zgjidhim: raporti mes të ardhurave, pasurive të shpëtuara dhe rrezikshmërisë së punës nuk është ende i shpërblyer sa duhet dhe në ekuilibër; ndërkohë, zjarrfikësit duhet të kenë menjëherë normën ushqimore.
/ad