Të gjithëve na ka ndodhur: një bluzë e preferuar del nga lavatriçja dhe papritur duket sikur është bërë për një fëmijë. Mjafton pak më shumë nxehtësi ose një program i gabuar dhe rroba mund të tkurret.
Në internet qarkullon një truk që premton ta rikthejë rrobën në madhësinë e mëparshme. Metoda përfshin njomjen e saj në ujë të vakët dhe zbutës flokësh, më pas shtrirjen e materialit dhe tharjen në ajër.
Tingëllon bukur. Por ekspertët e larjes së rrobave kanë një lajm jo fort të mirë: nuk ka prova se kjo metodë funksionon në mënyrë të qëndrueshme.
Ekspertët e laboratorit të kujdesit për shtëpinë dhe pastrimit kanë provuar metoda të ndryshme për “çtkurrjen” e rrobave, por asnjëra nuk ka rezultuar efektive për një kohë të gjatë.
Madje, një produkt i krijuar posaçërisht për këtë qëllim u testua nga ekspertët dhe funksionoi vetëm herën e parë. Pas larjes së rrobës, ajo u tkurr sërish.
Pse tkurren rrobat?
Jo të gjitha materialet janë njësoj të prirura për t’u tkurrur. Materialet sintetike, si poliesteri dhe elastani, zakonisht janë më rezistente.
Problemi shfaqet më shpesh me pëlhurat natyrale, si pambuku, mëndafshi dhe leshi.
Kur këto materiale ekspozohen ndaj temperaturave të larta dhe rrotullimit të fortë në lavatriçe ose tharëse, fijet e tyre mund të shtrëngohen. Rezultati? Rroba më e vogël se më parë.
Pra, a mund ta rikthesh një rrobë të tkurrur?
Në praktikë, jo në mënyrë të besueshme.
Truku me ujë të vakët dhe zbutës flokësh mund të duket sikur funksionon përkohësisht, sidomos kur materiali zgjatet me dorë. Por ekspertët nuk e konsiderojnë një zgjidhje të qëndrueshme.
Nëse rroba është tkurrur ndjeshëm, mënyra më e mirë është të mos mbështetesh tek truket virale, por të përpiqesh ta parandalosh problemin herën tjetër.
Si t’i mbrosh rrobat nga tkurrja?
Lexo etiketën. Udhëzimet e kujdesit tregojnë temperaturën dhe mënyrën e larjes që i përshtaten materialit. Mund të duket si një detaj i vogël, por është mënyra më e thjeshtë për të shmangur tkurrjen.
Përdor ujë të ftohtë. Temperaturat e ulëta janë më të buta me pëlhurat dhe ndihmojnë në parandalimin e tkurrjes, zbehjes së ngjyrave dhe dëmtimit të fibrave.
Thaji në ajër ose me temperaturë të ulët. Nxehtësia mund të bëjë që disa fibra të kontraktohen. Për rrobat që tkurren lehtë, tharja në ajër është zgjedhja më e sigurt.
Zgjidh larjen delikate. Për disa veshje, larja me dorë ose përdorimi i një programi delikat mund të shmangë fërkimin dhe lëvizjet e tepërta që dëmtojnë materialin./mxh