Larja e dhëmbëve mund të mos jetë më thjesht një rutinë e përditshme. Dyson ka prezantuar CameraJet™, një furçë elektrike inteligjente që përdor kamerë, sensorë dhe Inteligjencë Artificiale për të analizuar mënyrën se si pastrohen dhëmbët.
Pajisja, e cila kushton rreth 499 dollarë, përfshin një mini-kamerë intraorale që filmon dhe analizon pjesë të gojës gjatë larjes. Sipas kompanisë, kjo teknologji mund të evidentojë zona që kërkojnë më shumë vëmendje, përfshirë shenja që mund të lidhen me kavitete.
Por CameraJet nuk ndalet vetëm te monitorimi. Sistemi kombinon teknologjinë sonike me një rrymë të lëngshme, e cila mund të drejtohet në mënyrë të automatizuar drejt hapësirave mes dhëmbëve për një pastrim më të fokusuar.
Të dhënat e mbledhura gjatë larjes shfaqen në aplikacionin MyDyson. Përdoruesi mund të shohë se cilat zona janë pastruar, sa mirë është realizuar teknika dhe nëse është ushtruar presion i tepërt gjatë larjes.
Pas këtij produkti qëndron një proces zhvillimi disavjeçar. Dyson thotë se ka punuar për gjashtë vite mbi teknologjinë, me përfshirjen e 661 inxhinierëve, 38 patentave dhe 16 milionë rreshtave kodimi.
Edhe detajet teknike janë menduar për një përdorim sa më praktik. Furça ka koka me gjurmim RFID, rezervuar të rimbushshëm për lëngun, bateri të zëvendësueshme dhe një bazë që shërben si për karikim, ashtu edhe për rimbushjen e pajisjes.
Me këtë produkt, Dyson po përpiqet të sjellë Inteligjencën Artificiale dhe monitorimin në kohë reale në një prej rutinave më të zakonshme të përditshmërisë.
Megjithatë, funksionet e saj për identifikimin e zonave problematike nuk zëvendësojnë kontrollin profesional te dentisti./mxh