Kanye West ka rikthyer në qendër të vëmendjes marrëdhënien e tij të ndërlikuar me Kim Kardashian, këtë herë përmes kritikave të drejtpërdrejta ndaj mënyrës se si ish-bashkëshortja po rrit katër fëmijët e tyre.
Gjatë një transmetimi live në Instagram, reperi foli për atë që e konsideron si një mënyrë jetese tepër të ekspozuar ndaj kamerave. Ai pretendoi se fëmijët duhet të kenë një ambient familjar dhe privat, larg presionit të vazhdueshëm të imazhit publik.
Sipas West, prania e dadove dhe mënyra e organizimit të jetës familjare janë gjithashtu pjesë e problemit. Ai theksoi se nuk i konsideron dadot si diçka negative në vetvete, por pretendoi se Kim mbështetet shumë tek ato për përkujdesjen e përditshme ndaj fëmijëve.
Reperi u ndal edhe te vajza e tyre, North West, duke shprehur shqetësimin e tij për mënyrën se si ajo prezantohet publikisht dhe për disa prej zgjedhjeve të saj në pamje.
North, 13 vjeçe, është shfaqur së fundmi me piercing-e, përfshirë një në buzë, si dhe me një tatuazh të përkohshëm në fytyrë. Këto paraqitje kanë shkaktuar diskutime online rreth kufijve që duhet të vendosen për fëmijët e moshave të reja.
Në deklaratat e tij, Kanye argumentoi se North duhet të ketë mundësinë të jetojë fëmijërinë e saj pa u trajtuar si një figurë e rritur e industrisë së modës dhe spektaklit.
Ndërkohë, Kim Kardashian nuk ka reaguar publikisht ndaj deklaratave të fundit të reperit. Dyshja, të cilët kanë katër fëmijë së bashku, prej vitesh kanë pasur përplasje publike lidhur me bashkëprindërimin dhe mënyrën e rritjes së tyre./mxh