Vera mund të ketë qenë sezoni i thonjve të bardhë, perlë apo me efekt mermaid, por shtatori po sjell një paletë krejt tjetër. Këtë vjeshtë, manikyri po shkon drejt nuancave më të thella, më të ngrohta dhe më të sofistikuara, nga çokollata e errët dhe e kuqja qershi, te jeshilja si ulli dhe tonalitetet neutrale që mezi dallohen.
Estetistja Hannah Taylor thotë se çokollata, ulliri, e kuqja e thellë, kumbulla dhe ngjyrat e pasura si gurët e çmuar do të jenë ndër familjet kryesore të ngjyrave këtë sezon. Ndërkohë, efektet chrome, magnetike dhe teksturat e ndryshme pritet të vazhdojnë edhe gjatë vjeshtës.
Nëse preferoni manikyrin minimalist, lajmi i mirë është se nuancat e tejdukshme nuk po largohen. Bezhë-rozë, gri-kafe shumë e hapur dhe jeshile sage janë disa nga alternativat më të buta të sezonit.
Ja disa prej nuancave më IN të sezonit:
Çokollatë e errët
Një kafe moka e thellë që duket menjëherë elegante dhe e kuruar. Është një nga ato ngjyra që funksionon po aq mirë në thonj të shkurtër sa edhe në forma më të gjata.
Bezhë-rozë
Manikyri minimalist vazhdon të jetë trend. Kjo nuancë e butë mes rozës dhe bezhës është neutrale, e pastër dhe shumë e lehtë për t’u kombinuar.
Jeshile e hapur
Nëse gjatë verës pamë shumë jeshile matcha, për vjeshtë ajo zbutet. Nuanca sage është më e qetë dhe më e ftohtë.
Kanellë e ngrohtë
Një tonalitet mes kafesë, portokallisë dhe kanellës që praktikisht duket si vjeshta në një manikyr.
Jeshile e errët
E zeza mbetet gjithmonë një nuancë klasike, por një jeshile shumë e errët dhe me shkëlqim është alternativa më interesante këtë sezon.
Kafe dhe blu
Një nga kombinimet më moderne të vjeshtës. Bluja e butë me kafe shumë të errët funksionon mirë në një model French ose me linja shumë të holla.
E kuqe qershi e ngrohtë
Bordo rikthehet çdo vjeshtë, por këtë herë versioni është pak më i ndritshëm. Një e kuqe qershi me shkëlqim jep të njëjtën elegancë, por duket më e freskët.
Shampanjë e tejdukshme
Për ato që duan shkëlqim pa kaluar te xixat, një nuancë shampanjë shumë e lehtë është zgjedhja ideale. Reflekton dritën, por mbetet minimaliste.
Gri kërpudhë
Një gri e butë me nënton kafe, që pritet të jetë një nga neutralet më të përdorura të sezonit dhe është më interesante se bezha klasike.
Jeshile ulliri e ftohtë
Tokësore, pak e pazakontë dhe shumë vjeshtore. Nëse doni një ngjyrë që nuk është as e kuqe, as kafe, kjo është një nga alternativat më të mira./k.m
