Një njohje e re mund të nisë me një bisedë të shkurtër në palestër, një kafe në lagje apo një takim rastësor, por kthimi i saj në një miqësi të vërtetë kërkon diçka më shumë: kohë.
Një studim ka llogaritur se sa orë duhen që një person të kalojë nga një njohje e thjeshtë në një mik të afërt. Psikiatrja Dr. Sue Varma ka folur për këtë temë në emisionin TODAY, duke iu referuar kërkimeve mbi mënyrën se si krijohen miqësitë në moshë madhore.
Sa kohë duhet për të krijuar një miqësi?
Sipas hulumtimit të Jeffrey Hall, profesor i asociuar në Universitetin e Kansasit, duhen rreth 40 deri në 60 orë që një njohje të zhvillohet në një miqësi të rastësishme. Për t’u bërë miq më të afërt, nevojiten rreth 80 deri në 100 orë, ndërsa për të krijuar një miqësi vërtet të ngushtë duhen më shumë se 200 orë.
Studimi, i publikuar në Journal of Social and Personal Relationships, analizoi përgjigjet e 355 të rriturve që ishin zhvendosur së fundmi dhe po përpiqeshin të krijonin miqësi të reja. Pjesëmarrësit përshkruan marrëdhëniet e tyre me njerëz të rinj, nga njohje të thjeshta deri te miqësi të ngushta, duke i dhënë studiuesit mundësinë të llogariste kohën që kërkon secila fazë.
Pra, një bisedë e këndshme apo një takim i vetëm nuk mjafton për të krijuar një miqësi të fortë. Koha e kaluar së bashku dhe përsëritja e takimeve janë ato që e forcojnë gradualisht lidhjen.
Si të krijoni miqësi të reja në moshë madhore
Të krijosh miq të rinj pas një moshe të caktuar mund të duket më e vështirë, sidomos kur rutina është e mbushur me punë dhe angazhime. Megjithatë, Dr. Sue Varma sugjeron disa hapa të thjeshtë: të zgjidhni vende që ju pëlqejnë, të nisni me pyetje të thjeshta, të tregoni interes për personin tjetër dhe të mos keni frikë të bëni hapin e parë.
Qëndrueshmëria është një nga çelësat kryesorë. Të frekuentoni rregullisht të njëjtat vende ju jep më shumë mundësi të takoni të njëjtët njerëz dhe të krijoni gradualisht një lloj familiariteti.
Në palestër, për shembull, mund të nisni një bisedë duke pyetur dikë për një klasë, një ushtrim apo një trajner. Në një kafene ku shkoni shpesh, mund të pyesni për vende interesante në zonë. Nuk është e nevojshme që biseda e parë të jetë e gjatë apo shumë personale.
Edhe nëse duhet të bëni ju hapin e parë më shumë se një herë, kjo nuk do të thotë se tjetri nuk është i interesuar për miqësi. Miqësitë kërkojnë kohë dhe përpjekje nga të dyja palët.
Edhe pasi një njohje është kthyer në miqësi, marrëdhënia ka nevojë për vëmendje. Takimet e rregullta, bisedat dhe interesimi i sinqertë për jetën e tjetrit ndihmojnë që lidhja të mos zbehet.
Sipas Dr. Varma, ndarja e gjërave më personale mund ta bëjë një miqësi më të thellë. Kjo mund të jetë diçka e thjeshtë, si të tregosh për një shqetësim, të kërkosh këshillë apo të flasësh hapur për diçka që të ka ndodhur.
Në vend që të përpiqeni gjithmonë të dukeni interesantë, është më e rëndësishme të tregoni interes të vërtetë për personin përballë jush. Kurioziteti, dëgjimi dhe dëshira për ta njohur dikë më mirë mund të jenë shumë më të rëndësishme sesa të gjeni gjithmonë diçka interesante për të thënë.
Miqtë e mirë janë të rëndësishëm edhe për shëndetin
Miqësitë e ngushta nuk kanë të bëjnë vetëm me shoqërinë apo argëtimin. Marrëdhëniet e mira shoqërore janë lidhur edhe me mirëqenie më të mirë fizike dhe mendore.
Sipas Dr. Varma, lidhjet shoqërore mund të luajnë rol edhe në jetëgjatësi, ndërsa mungesa e lidhjeve të forta me të tjerët është shoqëruar me rreziqe të rëndësishme për shëndetin.
Kështu që, nëse dikush i takuar së fundmi në palestër apo në kafenenë e lagjes nuk është ende “miku juaj”, ndoshta thjesht nuk kanë kaluar mjaftueshëm orë së bashku. Miqësia, sipas studimit, është më shumë një proces sesa një moment./mxh