Jennifer Lawrence ka sjellë një ndryshim të ri në pamjen e saj për vjeshtën dhe këtë herë vëmendjen e kanë marrë baluket e saj të reja, një model që ndërthur butësinë e balukeve “curtain” (perde) me pamjen karakteristike të balukeve franceze.
Në shtatorin e vitit të kaluar, aktorja u shfaq me baluke të prera drejt, të frymëzuara nga modeli i famshëm i Jane Birkin. Për muaj me radhë, ajo i stiloi në mënyra të ndryshme, por këtë shtator duket se ishte koha për një ndryshim të ri.
Më 4 shtator, stilisti i flokëve të personazheve të famshëm, Chris Appleton, publikoi pamjen e re të Jennifer Lawrence, duke zbuluar modelin që ai e quan “baluke butterfly” (flutur). Emri vjen nga forma e balukeve, të cilat hapen në anë dhe krijojnë një siluetë që të kujton krahët e një fluture.
Modeli është pikërisht në kufirin mes balukeve perde dhe balukeve franceze. Fijet e lehta dhe të holla bien deri te vetullat, ndërsa anash hapen drejt mollëzave dhe përzihen natyrshëm me pjesën tjetër të flokëve.
Rezultati është një pamje e butë dhe e çrregullt në mënyrën e duhur, e cila shkon shumë me flokët me onde të Jennifer Lawrence.
Çfarë janë “baluket flutur”?
Ky model mund të përshkruhet si një version më i lehtë i balukeve perde. Në qendër, baluket janë më të shkurtra dhe më të holla, ndërsa në anë zgjaten drejt mollëzave.
Sipas Chris Appleton, tipari kryesor i tyre është mënyra si hapen në të dyja anët për të kornizuar fytyrën. Ndryshe nga disa modele të tjera balukesh, ato nuk krijojnë një vijë të rëndë mbi ballë, por përdorin shtresa të lehta për të dhënë më shumë volum dhe lëvizje.
Shtresat pranë pjesës së sipërme të kokës janë më të shkurtra dhe gradualisht bëhen më të gjata ndërsa zbresin drejt anëve të fytyrës.
Kjo i bën baluket të duken më të buta dhe më natyrale, ndërsa krijojnë një efekt të bukur rreth fytyrës.
A i shkojnë çdo forme fytyre?
Në parim, po, por dendësia dhe gjatësia mund të përshtaten sipas tipareve të fytyrës.
Baluket e lehta dhe të holla mund të zbusin tiparet më të theksuara dhe këndore, ndërsa një model pak më i plotë mund t’u japë më shumë volum fytyrave të rrumbullakëta ose ovale.
Dhe nuk është një model që funksionon vetëm te flokët bjondë. Lëvizja e balukeve drejt pjesës së jashtme të fytyrës mund të nxjerrë në pah edhe ngjyrat më të errëta të flokëve, veçanërisht ato që janë tipike për vjeshtën.
Si t’ia kërkoni parukieres?
Nëse dëshironi të provoni këtë model, Appleton sugjeron të kërkoni shtresa të buta që kornizojnë fytyrën dhe përzihen gradualisht me pjesën tjetër të flokëve.
Sekreti qëndron te mënyra si priten shtresat. Ato duhet të krijojnë një hapje të lehtë drejt jashtë, në vend që të bien drejt mbi fytyrë.
Pas prerjes, volumet e lehta mund të ndihmojnë që baluket të marrin atë lëvizjen karakteristike që i jep modelit pamjen e një fluture.
Si stilohen baluket flutur?
Për Jennifer Lawrence, kombinimi ideal është ai me fryrjen klasike të flokëve të viteve ’90.
Një tharje me volum dhe maja të kthyera lehtë nga jashtë i jep balukeve lëvizjen e nevojshme, ndërsa flokët duken më të plotë dhe fytyra merr një kornizë më të butë.
Nëse baluket perde ju duken shumë të zakonshme, por baluket e plota franceze ju duken tepër të theksuara, modeli i Jennifer Lawrence mund të jetë pikërisht mesi i artë: i lehtë, me volum dhe mjaftueshëm i ndryshëm për t’i dhënë një pamjeje të re gjithë flokëve./k.m