CV-ja është shpesh përshtypja e parë që një punëdhënës krijon për ju, ndaj mënyra se si e prezantoni veten ka më shumë rëndësi nga sa mund të mendoni. Përpara se të keni mundësinë të uleni përballë menaxherit të punësimit në një intervistë, dokumenti juaj duhet të tregojë qartë kush jeni, çfarë dini të bëni dhe çfarë mund të sillni në një kompani.
Për këtë arsye, çdo fjalë e përdorur në CV duhet të ketë një qëllim. Një formulim i zgjedhur mirë mund të nxjerrë në pah aftësitë dhe kontributin tuaj, ndërsa shprehjet e përgjithshme ose të panevojshme mund ta bëjnë profilin tuaj të duket më pak bindës.
Fjalët që është më mirë të shmangni
Alisha Miranda, autore e librit Surviving Job Loss: A Millennial’s Guide to Unemployment, këshillon të shmangen fjalët boshe, të cilat zënë vend në CV pa dhënë informacion konkret për kandidatin. Shprehje si “guru”, për shembull, mund të tingëllojnë të ekzagjeruara dhe nuk tregojnë domosdoshmërisht se çfarë aftësish zotëroni apo çfarë rezultatesh keni arritur.
Gjithashtu, është e rëndësishme të mos e përqendroni CV-në te dobësitë apo mungesa e përvojës. Terma si “junior”, kur nuk janë të nevojshëm për të përcaktuar pozicionin ose nivelin profesional, mund të zënë vendin e informacionit më të vlefshëm për atë që dini të bëni. Në vend që të theksoni se jeni ende në fillimet e karrierës, tregoni se si keni kontribuar në projektet ku keni marrë pjesë, çfarë përgjegjësish keni pasur dhe çfarë keni ndihmuar të arrijë ekipi.
Në thelb, CV-ja nuk duhet të jetë një listë me cilësi të përgjithshme, por një pasqyrë e qartë e përvojës dhe aftësive tuaja. Sa më konkrete të jenë informacionet, aq më lehtë do ta kuptojë punëdhënësi se çfarë mund të ofroni.
Fjalët që mund ta bëjnë CV-në tuaj më bindëse
Nga ana tjetër, disa folje mund t’ju ndihmojnë të tregoni më qartë aftësitë dhe kontributin tuaj. Fjalë si “ndërtoj”, “prodhoj” dhe “menaxhoj” e zhvendosin vëmendjen nga përshkrimet e përgjithshme te veprimet konkrete. Në vend që të shkruani se jeni një person i organizuar ose i aftë për të punuar në grup, mund të shpjegoni si keni menaxhuar një projekt, organizuar një proces apo bashkëpunuar me kolegët për të arritur një objektiv.
Edhe fjalë si “bashkëpunim” dhe “besueshmëri” mund të jenë të vlefshme, për sa kohë shoqërohen me shembuj që i mbështesin. Qëllimi nuk është të mbushni CV-në me terma që tingëllojnë profesionalë, por të zgjidhni ato që përshkruajnë më saktë mënyrën tuaj të punës.
Nëse e keni të vështirë të identifikoni pikat tuaja të forta, Miranda sugjeron t’u kërkoni mendim njerëzve që ju njohin në një kontekst profesional ose personal. Miqtë dhe kolegët mund t’ju ndihmojnë të dalloni cilësitë që ju karakterizojnë, por që ndoshta nuk i vini re vetë. Më pas, këto vlerësime mund t’i përfshini në CV, duke i lidhur me shembuj konkretë nga përvoja juaj.
Në fund, një CV e mirë nuk ka nevojë për fjalë të mëdha apo përshkrime të ekzagjeruara. Ajo duhet të jetë e qartë, e besueshme dhe e përshtatur me pozicionin për të cilin po aplikoni. Zgjidhni fjalë që tregojnë çfarë keni bërë, si keni kontribuar dhe çfarë mund të sillni në vendin e ri të punës. Sepse, përpara se të keni mundësinë ta tregoni këtë në një intervistë, CV-ja juaj duhet ta bëjë të qartë në letër./k.m