Një prej veshjeve më të famshme në historinë e muzikës pop pritet të tërheqë sërish vëmendjen e koleksionistëve. Xhaketa e kuqe dhe e zezë që Michael Jackson veshi në videoklipin ikonik “Thriller” do të dalë në ankand më 7 dhjetor, në një aktivitet kushtuar trashëgimisë së tij artistike.
Ngjarja do të organizohet nga Julien’s Auctions në hotelin Rosewood Abu Dhabi, në kuadër të ankandit “Michael Jackson: The Fashion Legacy”, ku do të prezantohen veshje dhe objekte të lidhura me karrierën e Mbretit të Pop-it.
E krijuar për videoklipin e vitit 1983 nga kostumografja Deborah Nadoolman Landis, xhaketa është kthyer ndër vite në një simbol të identitetit vizual të artistit. Dizajni i saj karakteristik, me shpatulla të theksuara, detaje metalike në mëngë dhe astar të kuq prej mëndafshi, e bëri menjëherë të dallueshme për publikun në mbarë botën.
Por vlera e saj nuk qëndron vetëm te historia e muzikës. Brenda veshjes gjendet edhe një dedikim personal i Jackson për stilistët e tij, Michael Bush dhe Dennis Tompkins: “To Bush and Dennis, All My Love Michael Jackson”. Firma e këngëtarit është vendosur gjithashtu në njërën prej mëngëve.
Si përfundoi xhaketa në duart e stilistëve?
Përpara se të përdorej në këtë mënyrë, veshja origjinale shërbeu si model për krijimin e kostumeve të ngjashme që Michael Jackson do të përdorte në performancat e tij të ardhshme. Pasi stilistët përfunduan punën, këngëtari ua dhuroi xhaketën, duke lënë mbi të edhe mesazhin personal.
Për videoklipin u krijua edhe një xhaketë e dytë, e përdorur në skenat ku artisti shfaqet si një zombi. Kjo veshje u dëmtua qëllimisht për efektet e xhirimeve dhe sot ruhet në Rock and Roll Hall of Fame, në Cleveland.
Xhaketa që do të dalë në ankand ka një histori të rëndësishme edhe në tregun e koleksioneve. Në vitin 2011, ajo u shit po nga Julien’s Auctions për 1.81 milionë dollarë, duke vendosur një rekord për një xhaketë të shitur në ankand. Për shitjen e ardhshme nuk është bërë ende publike një vlerë e pritshme.
Doreza e famshme e “moonwalk” pritet të shitet deri në 800 mijë dollarë
Xhaketa nuk do të jetë i vetmi objekt me rëndësi historike në këtë ankand. Mes artikujve që do të ofrohen është edhe doreza e bardhë e zbukuruar me gurë, të cilën Jackson e mbante gjatë performancës së “Billie Jean” në spektaklin televiziv “Motown 25: Yesterday, Today, Forever”, në vitin 1983.
Pikërisht në këtë performancë, këngëtari prezantoi para një audience të gjerë lëvizjen “moonwalk”, e cila më pas u bë një prej shenjave më të njohura të karrierës së tij.
Doreza vlerësohet të arrijë një çmim prej 600 mijë deri në 800 mijë dollarësh. Ajo ishte shitur më parë, në vitin 2009, për 430 mijë dollarë.
Koleksioni do të përfshijë gjithashtu dy palë këpucë të lidhura me performancat e artistit:
Mokasina të zeza prej lëkure, të markës Florsheim, të përdorura gjatë xhirimeve dhe provave të “Thriller”, me një vlerë të pritshme prej 30 mijë deri në 50 mijë dollarësh.
Këpucët e veshura gjatë performancës së “Motown 25”, të cilat vlerësohen nga 60 mijë deri në 80 mijë dollarë.
Martin Nolan, bashkëthemelues dhe drejtor ekzekutiv i Julien’s Auctions, e ka cilësuar këtë ankand si një mundësi për koleksionistët që të zotërojnë objekte të lidhura me momente përcaktuese të muzikës dhe kulturës pop.
Sipas tij, si xhaketa e “Thriller”, ashtu edhe doreza e famshme, përfaqësojnë periudha që ndikuan jo vetëm në muzikë, por edhe në modë dhe mënyrën se si artistët interpretojnë në skenë.
Me historinë e saj, dedikimin personal dhe rekordin e mëparshëm të shitjes, xhaketa e Michael Jackson pritet të jetë një prej objekteve më të komentuara të ankandit të dhjetorit./mxh