Last Updated on 28/10/2026 by Monika
Inter dhe Milan do të prezantojnë të enjten projektin zyrtar dhe imazhet e stadiumit të ri të qytetit, i cili është dizajnuar nga studiot Foster + Partners dhe Manica.
Impianti me kapacitet prej 71,500 vendesh do të ndërtohet si pjesë e një investimi total prej 2.3 miliardë eurosh, ku 708 milionë euro janë planifikuar vetëm për strukturën sportive.
Projekti parashikon një arenë të lartë 52 metra me dy unaza kryesore, tribuna afër fushës, mbulim fiks dhe rreth 13 mijë vende premium. Sipas planit kohor, lejet pritet të miratohen brenda verës së vitit 2027, për të nisur menjëherë punimet që do të garantojnë dorëzimin e impiantit midis vitit 2031 dhe 2032, në kohë për Kampionatin Evropian Euro 2032.
Pas inaugurimit të arenës së re, do të nisë procesi i prishjes së pjesshme dhe rikonstruksionit të stadiumit historik “San Siro”, një operacion që pritet të kushtojë 115 milionë euro dhe të zgjasë rreth dy vite. Përveç stadiumit, rreth 371 milionë euro do të investohen për rikuperimin e zonës rrethuese dhe ndërtimin e njësive tregtare, duke synuar përfundimin total të punimeve në vitin 2036.
Investimi më i madh në historinë e dy klubeve po menaxhohet përmes një formule financimi, ku faza e parë u mbështet me 354 milionë euro nga një grup bankash ndërkombëtare si Goldman Sachs, Morgan Stanley dhe JPMorgan./mxh