Last Updated on 11/11/2026 by Klara
Aktori amerikan i teatrit dhe kinemasë, Stacy Keach, është ndarë nga jeta në moshën 85-vjeçare. I njohur për rolet e tij në filmat “Fat City”, “The Ninth Configuration” dhe serialet televizive “The New Mike Hammer” dhe “Prison Break”, Keach ishte një nga figurat më të spikatura të skenës dhe ekranit amerikan.
Lajmi për vdekjen e tij u konfirmua nga bashkëshortja, Małgosia Tomassi, e cila bëri të ditur se aktori ndërroi jetë në banesën e familjes në Magdalenka të Polonisë, pas një beteje të gjatë dhe të vështirë me probleme serioze të zemrës dhe insuficiencë kardiake.
“Stacy nuk ishte vetëm një aktor legjendar, i admiruar dhe i dashur nga publiku në të gjithë botën, por edhe bashkëshorti im i dashur, shoku im i jetës dhe zemra e familjes sonë. Largimi i tij lë një boshllëk të pamatshëm në jetën tonë. Megjithatë, shpirti i tij i jashtëzakonshëm, zëri i paharrueshëm dhe dashuria që dhuroi bujarisht do të mbeten përgjithmonë me ne”, thuhej në deklaratën e saj.
I lindur në Savannah të Xhorxhias, Keach ishte djali i dy aktorëve që ishin njohur gjatë studimeve në Universitetin Northwestern. Ai studioi në Universitetin e Kalifornisë në Berkeley, ku përfundoi studimet në letërsi angleze dhe art dramatik. Më pas vazhdoi formimin artistik në Shkollën e Dramës në Yale dhe në Akademinë Mbretërore të Muzikës dhe Artit Dramatik në Londër, si bursist Fulbright.
Karrierën e nisi në teatër, ku interpretoi personazhe të rëndësishme të dramaturgjisë klasike, përfshirë Henrin V, Mercution dhe Lord Berowne. Me kalimin e viteve, ai ndërtoi një karrierë të gjatë dhe të larmishme, duke u shndërruar në një aktor që mund të përballonte me të njëjtën mjeshtëri role dramatike, historike dhe personazhe komplekse.
Përveç rolit të detektivit privat Mike Hammer, me të cilin u identifikua gjerësisht nga publiku, Keach spikati në filmin “Fat City” të regjisorit John Huston, “The Ninth Configuration”, “The Life and Times of Judge Roy Bean”, “American History X”, “The Bourne Legacy” dhe dramën “Nebraska”, të nominuar për çmimin Oscar. Një tjetër sukses i rëndësishëm ishte interpretimi i shkrimtarit Ernest Hemingway në një mini-serial televiziv gjashtëorësh, rol për të cilin fitoi çmimin Golden Globe.
Në vitin 2012, në një intervistë për revistën “New York”, aktori kishte shpjeguar se gjithmonë kishte synuar të provonte sa më shumë personazhe të ndryshme, edhe pse kjo zgjedhje mund t’i kishte kushtuar në karrierë. Ai kishte interpretuar edhe personazhe të mëdha të teatrit si Hamleti, Rikardi III dhe Mbreti Lir, përvoja nga të cilat, siç shprehej vetë, nuk do të hiqte dorë për asgjë.
Jeta e tij u shënua edhe nga një episod i vështirë në vitin 1984, kur u arrestua në aeroportin Heathrow të Londrës, pasi u përpoq të fuste kokainë në bagazhin e tij. Për këtë vepër u dënua me nëntë muaj burg, por u lirua pas gjashtë muajsh. Në librin autobiografik të vitit 2013, “All in All: An Actor’s Life On and Off the Stage”, Keach e përshkroi këtë periudhë si momentin më të ulët të jetës së tij.
Ironikisht, shumë vite më vonë, në serialin “Prison Break”, i transmetuar nga viti 2005 deri në vitin 2017, ai interpretoi rolin e një drejtori burgu. Aktori kishte treguar se personazhin e kishte ndërtuar pjesërisht duke u frymëzuar nga drejtori i burgut ku kishte vuajtur dënimin në Angli, të cilin e kujtonte si një njeri me shumë dhembshuri, të interesuar për rehabilitimin e të burgosurve.
Stacy Keach ishte martuar katër herë. Ai lë pas bashkëshorten Małgosia Tomassi dhe dy fëmijët e tij, Shannon dhe Karolina.
Me largimin e tij, kinemaja dhe televizioni amerikan humbasin një aktor me një karrierë shumëvjeçare, një zë të veçantë dhe një prani të fuqishme artistike në skenë dhe ekran./k.m