Last Updated on 13/11/2026 by EL
Nga portretet ekstreme të pilivesave te kërpudhat me pamje të pazakontë dhe insektet që të ngjallin frikë, përzgjedhja e këtij viti ofron një këndvështrim magjepsës mbi detajet më të vogla dhe shpesh të padukshme të botës që na rrethon.
Edicioni i tetë i konkursit ndërkombëtar Close-up Photographer of the Year (CUPOTY) 2026 ka publikuar listën e fotografive finaliste, të përzgjedhura nga një numër rekord prej 15 388 aplikimesh të fotografëve nga e gjithë bota. Fotot sjellin pamje të jashtëzakonshme të natyrës, duke zbuluar forma, ngjyra dhe detaje që syri i njeriut zakonisht nuk arrin t’i dallojë.
Fotografitë janë përzgjedhur në 11 kategori të ndryshme, ku përfshihen kafshët, insektet, merimangat dhe bota nënujore, si dhe një kategori e veçantë për fotografët e rinj. Organizatorët vlerësojnë se fotografia nga afër ka aftësinë të zbulojë aspekte të natyrës që shpesh kalojnë pa u vënë re, duke ndërthurur kreativitetin, mjeshtërinë teknike dhe kureshtjen për botën natyrore.
Bashkëthemeluesja e konkursit, Tracy Calder, e cilësoi përzgjedhjen e këtij viti si një demonstrim të jashtëzakonshëm të imagjinatës dhe aftësive fotografike, por edhe të dëshirës për të eksploruar detajet më të fshehta të natyrës.
Fituesi i çmimit të madh dhe fotografët më të mirë të secilës kategori do të shpallen në janar 2027. Deri atëherë, organizatorët kanë publikuar disa prej fotografive më mbresëlënëse të listës së finalistëve, të cilat ofrojnë një udhëtim vizual në një botë të vogël, por jashtëzakonisht të pasur me forma dhe bukuri.
