Last Updated on 28/03/2026 by Anisa
Përfaqësuesi i tij, Ayman Dahmani, deklaroi se “interesi i Barcelonës për lojtarin është i vërtetë” dhe shtoi se sulmuesi do të largohet nga Hoffenheimi vetëm nëse paguhet klauzola e tij e lirimit, e cila llogaritet rreth 25–29 milionë euro.
Fisnik Asllani, sulmuesi 22-vjeçar i Hoffenheimit, është një nga sulmuesit e kërkuar nga ekipi i Barcelonës në muajt e fundit dhe përfaqësuesi i tij, Ayman Dahmani, pranoi se ka pasur kontakte me klubin për një transferim të mundshëm gjatë verës.
Pasi Asllani ishte vendimtar në fitoren e Kosovës ndaj Sllovakisë (3-4) në ndeshjet play-off të Botërorit, duke shënuar një nga golat, Dahmani dha një intervistë për median “Erem News”, ku foli për bisedimet me katalanasit.
“Interesi i Barcelonës për lojtarin është real në këtë moment dhe ka pasur kontakt nga ana e klubit katalanas”, deklaroi Dahmani, i cili shtoi gjithashtu se Asllani do të largohet nga Hoffenheimi vetëm nëse paguhet klauzola e tij e lirimit.
Sipas disa mediave, vlera e kësaj klauzole të lirimit në kontratën e futbollistit llogaritet rreth 25 deri në 29 milionë euro.
Me kontratë të vlefshme deri në vitin 2029, Fisnik Asllani po zhvillon një sezon shumë të mirë me Hoffenheimin. Ai ka shënuar nëntë gola dhe ka dhënë pasime vendimtare që kanë çuar në gol në 28 ndeshje në të gjitha kompeticionet, ndërsa me përfaqësuesen e Kosovës ka shënuar katër gola në shtatë ndeshjet e fundit. Këto paraqitje kanë rritur interesin e disa klubeve europiane.
Te Barcelona po kërkohet një sulmues për sezonin e ardhshëm dhe sipas “Mundo Deportivo”, objektivi kryesor është Julián Álvarez, por Atlético de Madrid nuk do ta lejojë lehtë largimin e argjentinasit. Për këtë arsye, Fisnik Asllani shihet si një alternativë më e lirë dhe më e re, megjithëse ende i paprovuar në një ekip të madh./fjala.al