Aktori Ben Affleck, fitoi 1 milion dollarë në një lojë televizive në Shtetet e Bashkuara.
53-vjeçari u shfaq të mërkurën, më 29 korrik, në programin “Kush dëshiron të bëhet milioner”, së bashku me Jamie Ding, me qëllim që të fitonin shumën e madhe për një kauzë bamirësie.
Dyshja u përball me pyetjen finale: “Në një traditë vjetore të Ditës së Falënderimeve, cili nga emrat e mëposhtëm nuk i është dhënë një gjeli deti që është falur nga një president i SHBA-ve?”.
Opsionet ishin: Peanut Butter & Jelly, Tater & Tot, Mac & Cheese dhe Spaghetti & Meatball.
Pas diskutimit, ata vendosën të përdornin ndihmën telefonike, duke telefonuar bashkëpunëtorin afatgjatë të Ding në kuize njohurish, Steven Morrison, i cili megjithatë nuk mundi t’i ndihmonte.
Moderatori Jimmy Kimmel ndau me ta mendimin e tij dhe sugjeroi përgjigjen që do të zgjidhte vetë, e cila ishte “Spaghetti & Meatball”.
Në fund, Affleck dhe Ding i besuan vlerësimit të moderatorit dhe zgjodhën këtë përgjigje, e cila, siç u zbulua pak sekonda më vonë, ishte e saktë.
Paratë do të dhurohen për organizatën jofitimprurëse “Eastern Congo Initiative”, të cilën Affleck e themeloi së bashku me Whitney Williams në vitin 2010. Organizata mbështet iniciativa lokale në Kongon Lindore, duke ndihmuar në përmirësimin e aksesit në shërbimet bazë, krijimin e mundësive ekonomike dhe promovimin e drejtësisë./mxh