Last Updated on 31/07/2026 by Kesjana
Bota e futbollit është në zi pas ndarjes nga jeta të Franco Baresit, një prej mbrojtësve më të mëdhenj në historinë e futbollit italian dhe ikonë e padiskutueshme e Milanit. Ish-kapiteni legjendar i kuqezinjve u nda nga jeta në moshën 66-vjeçare.
Lajmi u konfirmua nga vetë Milani përmes një reagimi në rrjetet sociale, ku klubi i dha lamtumirën një prej figurave më të rëndësishme të historisë së tij.
“Historia e Milanit është në lot për ndarjen nga jeta të Franco Baresit. Shembulli, karakteri dhe vlerat e tij do të mbeten përgjithmonë, ashtu si fanella me numrin 6, pjesë e ADN-së dhe historisë së klubit. Ngushëllimet tona shkojnë për familjen e tij dhe për të gjithë tifozët kuqezi në këtë moment të dhimbshëm”, thuhet në mesazhin e klubit.
Pas tërheqjes nga futbolli në vitin 1997, Milani vendosi të tërhiqte përgjithmonë fanellën me numrin 6, në nder të kapitenit të tij historik.
Sipas mediave italiane, në vitin 2025 Baresi iu nënshtrua një operacioni pas zbulimit të një noduli në mushkëri. Gjendja e tij dukej se ishte përmirësuar, por një rikthim i sëmundjes rezultoi fatal. Ditët e fundit, në rrjetet sociale kishin qarkulluar edhe lajme të rreme për vdekjen e tij, të cilat tashmë janë konfirmuar zyrtarisht.
Franco Baresi lindi më 8 maj 1960 në Travagliato, pranë Breshias. Ai u rrit në akademinë e Milanit dhe debutoi me ekipin e parë në vitin 1978, në moshën 17-vjeçare. Gjatë gjithë karrierës së tij profesionale veshi vetëm fanellën e Milanit, duke u shndërruar në simbolin e klubit për më shumë se dy dekada.
Me kuqezinjtë fitoi 6 tituj kampionë të Italisë, 3 Kupa të Kampionëve/Champions League, 2 Superkupa të UEFA-s, 2 Kupa Interkontinentale, 4 Superkupa të Italisë, 2 tituj të Serisë B dhe një Kupë Mitropa.
Edhe me Kombëtaren italiane la gjurmë të pashlyeshme. Ai ishte pjesë e skuadrës që fitoi Kupën e Botës në vitin 1982, edhe pse nuk u aktivizua në asnjë ndeshje. Më pas fitoi medaljen e bronztë në Botërorin e vitit 1990 dhe atë të argjendtë në Botërorin e vitit 1994 në SHBA, ku, pavarësisht një dëmtimi të rëndë në menisk gjatë turneut, u rikuperua për finalen ndaj Brazilit.
Baresi do të kujtohet si një nga mbrojtësit më të mëdhenj të të gjitha kohërave, një kapiten simbol dhe një prej figurave që shkroi faqet më të lavdishme në historinë e Milanit dhe futbollit italian./kb