Last Updated on 20/09/2026 by EL
NJU JORK – Climate Week ka nisur në Nju Jork, në një kohë kur ndryshimet klimatike po sjellin pasoja gjithnjë e më të dukshme dhe tranzicioni drejt energjisë së pastër përballet me pengesa të shumta. Aktiviteti, i cili zhvillohet deri më 27 shtator, mbledh drejtues politikë dhe biznesmenë nga e gjithë bota për të diskutuar mënyrat se si ekonomitë mund të reduktojnë emetimet e karbonit dhe të përshpejtojnë kalimin drejt një sistemi energjetik më të qëndrueshëm.
Climate Week organizohet nga organizata joqeveritare Climate Group, në koordinim me punimet e Asamblesë së Përgjithshme të Kombeve të Bashkuara, që zhvillohen në të njëjtën periudhë në Nju Jork. Organizatorët e konsiderojnë atë aktivitetin më të madh në botë kushtuar ndryshimeve klimatike, me më shumë se një mijë aktivitete në pika të ndryshme të qytetit dhe një pjesëmarrje mesatare prej mbi 100 mijë personash.
Në ditët e para të aktivitetit pritet të marrin pjesë figura të larta politike, mes tyre kryeministri australian Anthony Albanese, sekretari i Jashtëm britanik Ed Miliband dhe kryeministrja e Islandës, Kristrún Frostadóttir.
Debatet e këtij viti përqendrohen në tre çështje kryesore: transformimin e sektorit energjetik, ndikimin që këto ndryshime po sjellin dhe nevojën për një veprim të koordinuar ndërkombëtar.
Diskutimet zhvillohen në një moment kur pasojat e ndryshimeve klimatike janë bërë gjithnjë e më të dukshme, nga ngjarjet ekstreme të motit dhe katastrofat natyrore deri te valët e të nxehtit që kanë prekur pjesë të ndryshme të botës.
Climate Group, e cila vepron prej rreth dy dekadash, synon të kontribuojë në krijimin e një ekonomie globale me zero emetime neto të karbonit deri në vitin 2050.
Sipas organizatorëve, sistemi energjetik po ndryshon me shpejtësi, ndërsa zinxhirët e furnizimit janë nën presion dhe kërkesa për energji elektrike po rritet, e nxitur nga elektrifikimi, inteligjenca artificiale dhe infrastruktura digjitale. Në të njëjtën kohë, tranzicioni energjetik po krijon mundësi të reja për investime, rritje ekonomike dhe konkurrueshmëri.
Por sfida kryesore, sipas Climate Group, nuk është më mungesa e ambicies, por zbatimi i saj. Rregulloret e vjetruara, kufizimet e infrastrukturës dhe tregjet që nuk janë të përshtatura me objektivat e tranzicionit po ngadalësojnë procesin.
Climate Week zhvillohet gjithashtu në një periudhë të karakterizuar nga zgjerimi i shpejtë i inteligjencës artificiale dhe rritja e kërkesës për energji që shoqëron qendrat e të dhënave dhe infrastrukturën digjitale, ndërsa politikat e administratës së Donald Trump kanë sjellë një qasje dukshëm më skeptike ndaj politikave klimatike.
Në sfond qëndrojnë edhe rezultatet e samitit të fundit global për klimën, COP30, të zhvilluar në Belém të Brazilit. Samiti arriti një marrëveshje për të mbështetur vendet më të prekura nga kriza klimatike, por nuk përcaktoi një afat të qartë për eliminimin gradual të përdorimit të lëndëve djegëse fosile.