Last Updated on 15/06/2026 by EL
Delfinët jetojnë në grupe të qëndrueshme dhe njihen me njëri-tjetrin për vite me radhë. Kjo u lejon të dallojnë sjelljet e individëve të ndryshëm dhe të veprojnë në bazë të përvojave të mëparshme. Një studim i publikuar në Proceedings of the National Academy of Sciences ka zbuluar se femrat e delfinit hundëshishe (tursiop) janë në gjendje të identifikojnë meshkujt më agresivë dhe priren t’i shmangin ata kur vjen momenti për të zgjedhur partner.
Kërkimi, i kryer nga studiues të University of Bristol, analizoi një popullatë delfinësh në Shark Bay, e studiuar prej më shumë se 40 vitesh. Vëzhgimet treguan se meshkujt shpesh tregojnë sjellje miqësore ndaj femrave, por gjatë periudhës së riprodhimit situata ndryshon.
Në këtë fazë, grupe meshkujsh mund të izolojnë dhe mbajnë nën kontroll femrat për periudha të gjata, duke u sjellë në mënyrë agresive. Në disa raste ato pengohen të largohen, madje mund të kafshohen ose goditen. Studiuesit testuan reagimin e femrave duke u riprodhuar regjistrime të thirrjeve të meshkujve që ato kishin njohur më parë. Rezultatet treguan se femrat kujtojnë cilët meshkuj kanë qenë më të dhunshëm ndaj tyre dhe priren t’i shmangin, duke favorizuar individë që kanë treguar sjellje më të buta. Studimi sugjeron se tek delfinët reputacioni ka rëndësi, femrat mbajnë mend përvojat negative dhe vendimet e tyre mund të ndikojnë drejtpërdrejt në suksesin riprodhues të meshkujve agresivë. Në botën e delfinëve, sjellja e keqe mund të ketë pasoja afatgjata./ET