Last Updated on 02/09/2026 by EL
Një studim i ri ka gjetur një lidhje të fortë mes varësisë nga lojërat në celular dhe dhimbjeve muskuloskeletore. Studentët që konsideroheshin të varur nga lojërat kishin më shumë se tre herë më shumë gjasa të raportonin dhimbje në qafë dhe mbi katër herë më shumë dhimbje në bërryla.
Lojërat në telefon mund të kenë pasoja jo vetëm për mirëqenien dixhitale, por edhe për shëndetin fizik. Ky është përfundimi i një studimi të ri, i cili evidenton një lidhje mes përdorimit problematik të lojërave në celular dhe rritjes së dhimbjeve në qafë, pjesën e sipërme të shpinës, bërryla dhe kyçe.
Studiuesit thonë se, ndërsa lojërat në celular po bëhen pjesë e përditshmërisë së shumë të rinjve, marrja e pushimeve më të shpeshta dhe shmangia e qëndrimit për një kohë të gjatë të përkulur mbi telefon mund të jenë të rëndësishme për shëndetin fizik.
Studimi përfshiu 364 studentë të mjekësisë në universitete në Jordani, me synimin për të parë nëse varësia nga lojërat në celular lidhej me problemet muskuloskeletore.
Rreth 9% e studentëve, ose 34 persona, plotësonin kriteret e përcaktuara nga studiuesit për varësi nga lojërat në celular.
Dhimbjet ishin dukshëm më të shpeshta
Dllimet mes dy grupeve ishin veçanërisht të dukshme në pjesët e sipërme të trupit, të cilat përfshihen më shumë gjatë përdorimit të zgjatur të telefonit.
•85.3% e studentëve me varësi nga lojërat raportuan dhimbje në qafë, krahasuar me 65% të studentëve të tjerë.
•Dhimbje në pjesën e sipërme të shpinës raportuan 64.7% e grupit me varësi, kundrejt 55% të pjesës tjetër.
•Për dhimbjet në bërryla, diferenca ishte edhe më e madhe: 41.2% e studentëve me varësi raportuan dhimbje, krahasuar me vetëm 12.5% të atyre që nuk konsideroheshin të varur.
•Dhimbje në kyçe dhe duar raportuan 41.2% e studentëve me varësi, kundrejt 34% të grupit tjetër.
Studimi tregoi gjithashtu se studentët me varësi nga lojërat kishin më shumë gjasa të thoshin se dhimbjet ndikonin në aktivitetet e tyre të përditshme, përfshirë studimet dhe aktivitetet e kohës së lirë. Disa prej tyre kishin kërkuar edhe ndihmë mjekësore për dhimbje në kyçe dhe duar, si dhe për shqetësime në ije dhe gjunjë.
Problemi mund të jetë edhe mënyra si mbahet telefoni
Përveç kohës së gjatë para ekranit, studiuesit ngrenë shqetësimin edhe për mënyrën se si përdoret telefoni.
Mbajtja e pajisjes për periudha të gjata mund të shkaktojë tendosje të vazhdueshme të duarve, pozicion të fiksuar të krahëve dhe qafës dhe lëvizje të përsëritura. Me kalimin e kohës, këto mund të kontribuojnë në shfaqjen e dhimbjeve dhe shqetësimeve muskuloskeletore.
Për këtë arsye, autorët e studimit argumentojnë se lojërat në celular nuk duhet të shihen vetëm si çështje e kohës para ekranit apo e mirëqenies psikologjike.
Studiuesit rekomandojnë më shumë ndërgjegjësim për shëndetin dixhital, edukim mbi ergonominë, përmirësim të qëndrimit të trupit dhe ndryshime në mënyrën e përdorimit të pajisjeve.
Universitetet, sipas tyre, mund të përfshijnë këshilla për pushime të rregullta, pozicionimin e duhur të telefonit dhe zakone më të shëndetshme gjatë lojërave, veçanërisht për studentët që kalojnë shumë orë duke studiuar ose punuar para ekraneve. Në praktikë, mesazhi është i thjeshtë: nëse kaloni orë të tëra duke luajtur në telefon, mos prisni që qafa, shpina dhe duart të mos reagojnë. Pushimet e shkurtra dhe ndryshimi i pozicionit mund të jenë po aq të rëndësishme sa vetë koha që kaloni para ekranit.