Shtatori po afron dhe bashkë me të rikthehet gara mes televizioneve shqiptare për audiencën. Pas pushimeve verore, moderatorët, gazetarët dhe figurat e njohura po bëhen gati të rikthehen në ekran, por këtë herë shumë prej tyre nuk do t’i shohim aty ku jemi mësuar.
Sezoni i ri televiziv pritet të sjellë një sërë lëvizjesh, largimesh dhe rikthimesh, ndërsa disa prej programeve më të ndjekura do të vijnë me formate të ndryshuara.
Në krye të interesit është sërish “Big Brother VIP Albania”. Rikthimi i reality show-t duket i konfirmuar, ndërsa producentja Sara Hoxha ka dhënë sinjalin e saj përmes një reagimi në rrjetet sociale. Edhe pse ende nuk janë zbuluar të gjitha detajet, Ledion Liço përflitet sërish si moderatori i spektaklit. Përfundimisht, përgjigjet pritet të jepen vetëm në momentin e startit.
Ndërkohë, Alketa Vejsiu nuk pritet të rikthehet këtë sezon në rolin e opinionistes së BBV, pavarësisht se paraqitja e saj sezonin e kaluar ngjalli mjaft interes.
Një tjetër emër që ka qenë në qendër të zërave për një lëvizje televizive është Arbana Osmani. Por, ndryshe nga sa është përfolur, ajo pritet të vijojë të jetë pjesë e “Ferma VIP”. Moderatorja do të drejtojë formatin për të dytin vit dhe përgatitjet për edicionin e ri kanë nisur.
Ndërkohë, Bora Zemani duket se do të bëjë një pauzë nga ekrani. Sipas informacioneve të publikuara, ajo nuk pritet të transferohet në një televizion tjetër, por nuk ka marrë përsipër një program për fillimin e sezonit. Fokusin e saj pritet ta ketë te riorganizimi dhe zhvillimi i markës së saj të modës “Zeman”.
Lëvizje të reja priten edhe në Vizion Plus. Pas ndryshimeve në stafin drejtues dhe largimit të disa figurave të njohura, televizioni pritet të ketë një tjetër surprizë në programacionin e mëngjesit. Moderatorja dhe gazetarja Kostana Morava pritet të jetë në krye të emisionit të mëngjesit, duke marrë përsipër një nga hapësirat e rëndësishme të ekranit gjatë sezonit të ri. Në Vizion Plus pritet gjithashtu rikthimi i Fjodora Fjorës.
Një ndryshim i rëndësishëm vjen edhe nga Top Channel. Selin Bollati, e cila u shpall fituese e edicionit të kaluar të “Big Brother VIP Albania”, pritet të kalojë nga roli i personazhit të reality show-t në atë të moderatores. Ajo pritet t’i bashkohet “Goca dhe Gra”, duke u bërë pjesë e panelit të programit. Ende nuk është zyrtarizuar se cilin vend do të zërë në panel.
Në anën tjetër, “Fiks Fare” përgatitet për një ndryshim të madh pas largimit të Filip Çakullit, i cili ishte pjesë e programit për rreth 25 vite. Formati pritet të rikonceptohet dhe në qendër të pikëpyetjeve janë edhe Xhemi Shehu dhe Jul Deda. Për Xhemin, megjithatë, angazhimi në “Portokalli” pritet të vijojë, këtë herë si pjesë e kastit të aktorëve.
Edhe “Për’puthen” do të nisë një kapitull të ri. Programi pritet të ketë ndryshime në drejtim, autorësi dhe kast. Ronaldo Sharka përflitet si autori i ri, ndërsa Heidi Baci është emri që qarkullon për moderimin. Në rolin e opinionistëve janë përmendur Erjola Doçi dhe Arjan Konomi.
Ndryshime priten edhe në programet e paradites. “Në Shtëpinë tonë” pritet të rikthehet me një tjetër konfigurim, ndërsa Julka Gramo nuk pritet të jetë më në rolin e moderatores.
Edhe ekranet informative nuk kanë shpëtuar nga lëvizjet. Bora Shahini ka njoftuar largimin nga A2 CNN dhe vendin e saj pritet ta marrë Anila Çela. Ndërkohë, “Vila 24” në News 24 pritet të ketë një tjetër moderatore, me Valbona Mhillin që pritet të marrë drejtimin e programit.
Me kaq shumë emra që lëvizin, rikthehen apo largohen nga ekranet, sezoni i ri televiziv duket se do të jetë një nga më të ndryshuarit e viteve të fundit. Pyetja që mbetet është: cilat prej këtyre lëvizjeve do të konfirmohen dhe cilat do të rezultojnë surprizat e mëdha të shtatorit?/mxh