Last Updated on 10/04/2026 by Anisa
Pas mbledhjes së Këshillit të Ministrave, ministrja e Ekonomisë, Delina Ibrahimaj, foli edhe për çmimet e karburanteve dhe produkteve të shportës, duke theksuar se qeveria po monitoron tregun në baza ditore dhe do të ndërhyjë për të mbështetur shtresat në nevojë.
Ajo kujtoi se çmimi i naftës u ul një ditë më parë me 10 lekë, pas mbledhjes së Bordit të Transparencës, ndërsa theksoi se ditët e fundit janë vërejtur rritje të çmimeve te frutat dhe sidomos te perimet.
“Dje bëmë një ulje domethënëse të çmimit të naftës. Sigurisht, në bazë ditore ne monitorojmë çmimet me qëllim që të garantojmë çmimet në tabelat e karburanteve. Ditët e fundit, që nga mesi i muajit mars, kemi parë rritje të çmimeve të frutave dhe perimeve. Inflacioni në muajin mars ishte 2.6 për qind, një rritje e lehtë. Që nga fillimi i krizës, kemi monitoruar në bazë ditore të gjitha produktet e shportës. Janë 80 produkte të shportës që monitorohen çdo ditë. Rritja ka ndodhur te kategoritë e perimeve. Ne kemi filluar monitorimin, duke qenë se nga eksperienca e luftës në Ukrainë, në të gjithë botën pati rritje të inflacionit. Ky është një shqetësim që monitorohet dhe diskutohet në çdo mbledhje të Këshillit të Ministrave. Do të subvencionojmë personat në nevojë. Do të kujdesemi të subvencionojmë shtresat në nevojë, pensionistët apo shtresat në nevojë që janë me të ardhura të ulëta, që nuk mund të përballojnë një rritje të çmimeve. Çmimet janë rritur si pasojë e luftës në Lindjen e Mesme, por ne jemi këtu për të garantuar që pasojat e luftës do të kenë ndikim minimal në ekonominë shqiptare”, u shpreh Ibrahimaj.
Ministrja la të hapur mundësinë që, në rast se do të ketë ndryshime të çmimeve në produktet e tjera të shportës, që prekin buxhetet familjare, atëherë do të hartohet një akt i veçantë që parashikon paketë subvencionimi vetëm për shtresat në nevojë, ku dominojnë pensionistët.
“Në të kaluarën ne kemi ndërhyrë në një subvencionim të shtresave në nevojë. Do të vijojmë monitorimin dhe, nëse do të shohim që çmimet do të rriten edhe në të gjitha produktet e tjera të shportës, padyshim që do të ndërhyjmë me një akt që do të subvencionojë rritjen e çmimeve për shtresat në nevojë”.