Last Updated on 30/10/2026 by EL
Fitimi neto i kompanisë britanike të energjisë BP u katërfishua gjatë periudhës korrik-shtator, pasi lufta me Iranin çoi në rritjen e ndjeshme të marzheve të rafinimit dhe çmimeve të naftës. Gjiganti britanik i energjisë tejkaloi parashikimet e analistëve dhe uli borxhin neto me 8.4 miliardë dollarë (7.5 miliardë euro), përpara prezantimit të strategjisë së re në dhjetor.
Fitimi i BP që u takon aksionarëve arriti në 4.7 miliardë dollarë (4.2 miliardë euro) për periudhën korrik-shtator, katër herë më shumë se 1.16 miliardë dollarët (1.04 miliardë euro) të regjistruar në të njëjtën periudhë të një viti më parë. Sipas kompanisë, ndërprerjet e shkaktuara nga lufta me Iranin rritën të ardhurat nga aktiviteti i rafinimit dhe tregtimit të naftës.
Kompania britanike e naftës dhe gazit tejkaloi gjithashtu parashikimet e analistëve dhe uli borxhin neto me 8.4 miliardë dollarë (7.5 miliardë euro), vetëm pak javë përpara se drejtuesja e re ekzekutive të prezantojë strategjinë e saj në dhjetor.
Fitimi bazë nga kostoja e zëvendësimit, treguesi kryesor mbi të cilin investitorët vlerësojnë performancën e BP, pothuajse u katërfishua, duke arritur në 8.5 miliardë dollarë (7.6 miliardë euro), nga 2.2 miliardë dollarë (1.96 miliardë euro) një vit më parë. Shifra ishte dukshëm më e lartë se 6.2 miliardë dollarët (5.55 miliardë euro) që prisnin analistët.
Ky tregues përjashton luhatjet në vlerën e rezervave të naftës dhe karburanteve të BP, si dhe zërat e jashtëzakonshëm, përfshirë zhvlerësimet prej 4 miliardë dollarësh (3.58 miliardë euro) të regjistruara gjatë këtij tremujori, kryesisht në ato që kompania i cilësoi si biznese të lidhura me tranzicionin energjetik.
Ashtu si konkurrentët e saj, BP përfitoi nga rritja e marzheve të rafinimit, diferenca mes çmimit që rafineritë paguajnë për naftën bruto dhe të ardhurave që sigurojnë nga produktet e përpunuara, si nafta dizel. Ndërsa lufta ka kufizuar eksportet e karburanteve nga Lindja e Mesme, rafineritë në rajone të tjera po përfitojnë nga furnizimi i kufizuar në tregjet globale.
Drejtoresha ekzekutive Meg O’Neill, e cila mori drejtimin në prill, i cilësoi rezultatet si “një grup të fortë treguesish financiarë, të mbështetur nga mjedisi i çmimeve dhe marzheve më të larta”.
Borxhi neto i kompanisë ra gjithashtu në 13.9 miliardë dollarë (12.4 miliardë euro), nga 22.3 miliardë dollarë (19.9 miliardë euro) tre muaj më parë. Në këtë ulje ndikoi edhe vendimi i BP për të pezulluar riblerjen e aksioneve në shkurt, duke orientuar paratë e lira drejt përmirësimit të bilancit financiar.
Kompania bëri të ditur se ka përmbushur tashmë objektivat për reduktimin e borxhit dhe kostove, ndërsa ka mbajtur të pandryshuar dividendin tremujor në 8.66 cent për aksion.
BP deklaroi gjithashtu se synon t’i japë përparësi përdorimit të parave të lira për të shlyer detyrimet e mbetura nga katastrofa e Deepwater Horizon, shpërthimi dhe derdhja e naftës në Gjirin e Meksikës në vitin 2010, ku humbën jetën 11 punonjës.
Vendimi vjen pasi javën e kaluar kompania ra dakord të përshpejtojë pagesat e marrëveshjes prej 16 miliardë dollarësh (14.3 miliardë euro) ndaj shtetit amerikan të Luizianës.
Më 15 dhjetor, O’Neill do të prezantojë strategjinë e saj të re, në një kohë kur BP, e konsideruar prej kohësh si një kompani që mbetet pas konkurrentëve të saj, ka reduktuar tashmë shpenzimet për energjinë e pastër, për t’u përqendruar sërish te nafta dhe gazi, sektorë që sjellin fitime më të larta.
Edhe konkurrentët Shell dhe TotalEnergies raportuan fitime rekord të enjten. Aksionet e BP u rritën me 0.3% në orët e para të tregtimit të së premtes.
Ku ndodhen aktualisht çmimet e naftës?
Nafta bruto Brent, referenca globale për çmimet e naftës, tregtohej rreth 113.6 dollarë për fuçi të premten në mëngjes, me një rritje prej rreth 2.5% gjatë javës. Kjo vjen pasi të hënën çmimi kishte rënë me më shumë se 6%, ndërsa përpjekjet diplomatike për t’i dhënë fund luftës me Iranin dukej se po përshpejtoheshin.
Megjithatë, çmimi mbetet shumë më i lartë se niveli prej rreth 72 dollarësh për fuçi, ku Brent tregtohej përpara fillimit të luftës me Iranin në fund të shkurtit.
Nafta bruto amerikane West Texas Intermediate (WTI), një tjetër referencë kryesore në tregjet ndërkombëtare, tregtohej rreth 104.2 dollarë për fuçi, me një rritje prej afërsisht 1.5% gjatë javës.
BP ka rritur gjithashtu çmimin e naftës që përdor për vlerësimin e aseteve të saj. Kompania parashikon tani që çmimi mesatar i Brent gjatë këtij viti të jetë 87 dollarë për fuçi, nga 70 dollarë që ishte parashikimi i mëparshëm. Të dyja shifrat janë përshtatur me inflacionin dhe llogariten mbi bazën e çmimeve të vitit 2024.
Kompania pret që ndërprerjet e furnizimit në Lindjen e Mesme të vazhdojnë deri në vitin 2027, ndërsa marzhet e rafinimit të “mbeten të larta” edhe gjatë tremujorit të fundit të këtij viti.