Shkencëtarët po përdorin inteligjencën artificiale (IA) për të përshpejtuar gjetjen e trajtimeve për sëmundjet neurologjike, duke analizuar të dhëna që mund të fshehin zgjidhje tashmë ekzistuese, sipas BBC.
Studiuesit në Institutin Britanik për Kërkimin e Demencës në Edimburg po shqyrtojnë regjistrime të zërit, skanime të syve dhe qeliza të trurit të kultivuara në laborator për të identifikuar ilaçe të miratuara më parë që mund të ripërdoren kundër sëmundjeve si skleroza laterale amiotrofike (MND).
Një nga pjesëmarrësit në studime, Steven Barrett, i diagnostikuar me MND para dhjetë vitesh, e përshkruan sëmundjen si shkatërruese për jetën dhe planet e së ardhmes. Megjithatë, ai e sheh kërkimin shkencor si një burim shprese. Në kuadër të provës klinike MND-SMART, disa ilaçe testohen njëkohësisht për të përshpejtuar identifikimin e trajtimeve efektive.
Instituti po ndërton gjithashtu një bazë të dhënash me persona që vuajnë nga Parkinsoni, demenca dhe MND.
Mjekët mbledhin skanime të irisit, regjistrime të zërit dhe mostra gjaku, ndërsa sistemet e inteligjencës artificiale analizojnë sasi të mëdha informacioni për të zbuluar shenja të hershme të përkeqësimit të sëmundjeve. Nga mostrat e gjakut krijohen qeliza nervore në laborator, mbi të cilat testohen ilaçe të ndryshme.
Algoritmet e mësimit makinerik janë trajnuar për të identifikuar barna që mund të transformojnë profilin biologjik të një sëmundjeje neurologjike në një gjendje më të shëndetshme. Ilaçet që rezultojnë premtuese nga analiza e AI-së mund të kalojnë më pas në prova klinike me pacientë.
Sipas studiuesve, kjo metodë mund të shkurtojë ndjeshëm kohën e nevojshme për të gjetur trajtime të reja.
Drejtori ekzekutiv i institutit, profesori Siddarthan Chandran, thekson se ekzistojnë rreth 1 500 ilaçe të miratuara për sëmundje të tjera dhe është e mundur që disa prej tyre të kenë efekte të dobishme edhe për trurin.
Për shkak se këto barna janë tashmë të testuara për sigurinë e tyre, ripërdorimi i tyre mund të jetë më i shpejtë dhe më pak i kushtueshëm sesa zhvillimi i një ilaçi krejtësisht të ri.
Edhe institucione të tjera kërkimore po eksplorojnë përdorimin e AI-së në mjekësi. Studiues në Institutin e Teknologjisë të Masaçusetsit (MIT) kanë identifikuar përbërës të rinj antibiotikë me ndihmën e inteligjencës artificiale, ndërsa shkencëtarët e Universitetit të Harvardit kanë zhvilluar modele që sugjerojnë përdorime të reja për barna ekzistuese.
Megjithëse disa trajtime të fundit për Alzheimerin kanë dhënë rezultate më modeste se sa pritej, profesor Chandran beson se kërkimi neurologjik ndodhet në prag të një transformimi të madh falë teknologjive të reja dhe inteligjencës artificiale./mxh