Shefi i Agjencisë Ndërkombëtare të Energjisë Atomike (IAEA) përsëriti thirrjen që Irani të lejojë inspektimet në sitet bërthamore kyçe që u goditën nga Izraeli dhe Shtetet e Bashkuara gjatë qershorit.
Tensionet mes Iranit dhe IAEA-së janë rritur vazhdimisht gjatë viteve të fundit dhe u përshkallëzuan më tej pas luftës 12-ditore të qershorit, e cila përfshiu sulme ajrore izraelite dhe amerikane ndaj objekteve bërthamore iraniane.
Që nga lufta, inspektorët e agjencisë nuk janë lejuar të hyjnë në objektet e goditura si “Fordo” dhe “Natanz”, ndonëse kanë pasur akses në disa zona të tjera.
“Ne kemi kryer disa inspektime, por nuk kemi mundur të vizitojmë vendet e sulmuara. Shpresoj të mundemi. Në fakt, ne duhet të shkojmë atje, sepse kjo është pjesë e detyrimeve të Iranit”, tha drejtori i IAEA-së, Rafael Grossi, pas hapjes së mbledhjes së rregullt të bordit drejtues në Vjenë.
“Shpresoj të ecim në mënyrë konstruktive,” shtoi ai.
Britania e Madhe, Franca, Gjermania dhe SHBA-ja kanë paraqitur një projektrezolutë që i kërkon Iranit “bashkëpunim të plotë” me IAEA-në. Dokumenti, i cili pritet të votohet këtë javë, thekson se është “imperative” që Irani të përmbushë detyrimet e tij sipas traktatit për mos-përhapjen bërthamore dhe t’i sigurojë agjencisë “akses sipas kërkesës”.
Zyrtarët iranianë paralajmëruan kundër miratimit të një rezolute kundër tyre, me zëvendësministrin e Jashtëm Kazem Gharibabadi që tha të dielën se një masë e tillë do ta detyronte Teheranin të “rishikonte në mënyrë themelore” marrëdhëniet me agjencinë.
Grossi deklaroi se nuk do të ishte “logjike” që një rezolutë të çonte në më pak bashkëpunim.
Javën e kaluar, IAEA kërkoi që Irani t’i lejojë verifikimin e stokut të uraniumit të pasuruar, veçanërisht sasitë e uraniumit shumë të pasuruar, të cilat janë “prej kohësh të tejkaluara” për t’u kontrolluar, sipas një raporti konfidencial.