Kanadaja ka njoftuar vendosjen e tarifave të reja ndaj produkteve amerikane, ndërsa përplasja tregtare mes Otavës dhe Uashingtonit po përshkallëzohet.
Ministri kanadez i Financave, François-Philippe Champagne, deklaroi se Kanadaja do t’u përgjigjet tarifave të reja të SHBA-së në mënyrë “proporcionale, të synuar dhe strategjike”, duke i barazuar ato “dollar për dollar dhe normë për normë”.
Duke nisur nga 8 shtatori, Kanadaja do të vendosë tarifa kundërpërgjigjëse prej 15%, 25% ose 50% ndaj importeve amerikane me vlerë 27.6 miliardë dollarë kanadezë.
Ky vendim vjen pasi SHBA-ja vendosi tarifa prej 50% ndaj mallrave kanadeze me vlerë rreth 28 miliardë dollarë kanadezë, pas dështimit të negociatave tregtare mes dy vendeve. Tarifat amerikane prekin produkte të ndryshme, nga shkopinjtë e hokejit dhe vera deri te çimentoja.
Champagne njoftoi gjithashtu një paketë ndihme prej 7.5 miliardë dollarësh kanadezë për punëtorët dhe bizneset, duke thënë se kushtet e propozuara nga administrata Trump ishin “joekonomike, të padrejta dhe përfundimisht të papranueshme”.
Ndërkohë, presidenti amerikan Donald Trump ka kërcënuar se nga 1 janari 2027, tarifat ndaj automjeteve, pjesëve të makinave dhe çelikut nga Kanadaja mund të rriten në 50%.
Në një postim në Truth Social, Trump tha se tarifat për të gjitha makinat, kamionët, pjesët e automjeteve dhe çelikun do të rriten në 50%. Aktualisht, tarifa amerikane për automjetet është 25% për përmbajtjen që nuk është prodhuar në SHBA.