Përdorimi i telefonit është bërë pjesë e pandashme e jetës së përditshme, por një zakon i njohur si “phubbing” mund të ketë pasoja negative për marrëdhëniet në çift.
Termi “phubbing”, i krijuar nga bashkimi i fjalëve phone dhe snubbing, i referohet situatës kur një person injoron partnerin për t’i kushtuar vëmendje telefonit. Një fenomen i ngjashëm është edhe “technoference”, që nënkupton ndërprerjen e aktiviteteve të çiftit nga telefonatat, mesazhet apo njoftimet e vazhdueshme.
Sipas një studimi të publikuar në vitin 2025 në revistën Human Behavior and Emerging Technologies, pjesëmarrësit përdornin telefonat inteligjentë mesatarisht gjatë 27% të kohës që kalonin pranë partnerit, ndërsa 86% deklaruan se e përdornin telefonin çdo ditë në praninë e tij.
Studimi sugjeron se përdorimi i shpeshtë i telefonit pranë partnerit mund të lidhet me kënaqësi më të ulët në marrëdhënie, cilësi më të dobët të bashkëprindërimit, si edhe me nivele më të larta të depresionit dhe kënaqësi më të ulët me jetën. Efektet rezultuan më të theksuara te gratë.
Megjithatë, teknologjia nuk ka vetëm ndikim negativ. Ajo mund t’i ndihmojë çiftet të qëndrojnë në kontakt, të organizojnë aktivitetet dhe të ndajnë momente të përbashkëta.
Një tjetër çështje që po bëhet gjithnjë e më e rëndësishme është privatësia digjitale. Çiftet mund të kenë qëndrime të ndryshme për ndarjen e vendndodhjes, publikimin e fotove në rrjetet sociale, përdorimin e pajisjeve të njëri-tjetrit apo ndarjen e fjalëkalimeve.
Ekspertët këshillojnë që partnerët të diskutojnë hapur kufijtë e tyre digjitalë dhe të mos ndihen të detyruar të ndajnë fjalëkalime apo informacione personale. Komunikimi dhe kompromisi, sipas tyre, janë thelbësorë për të shmangur konfliktet që teknologjia mund të krijojë në marrëdhënie.