Last Updated on 14/10/2026 by EL
Kolumbia ka inauguruar ambasadën e saj në Jerusalem, duke u bërë vendi i dhjetë që ka një përfaqësi diplomatike në qytet. Në ceremoninë e hapjes morën pjesë ministri i Jashtëm izraelit, Gideon Sa’ar, dhe homologu i tij kolumbian, Omar Bula Escobar.
Ministria e Jashtme e Izraelit e ka cilësuar këtë zhvillim si një hap të rëndësishëm drejt rivendosjes dhe forcimit të marrëdhënieve mes dy vendeve, pas përkeqësimit të lidhjeve diplomatike gjatë presidencës së ish-presidentit kolumbian Gustavo Petro. Marrëdhëniet mes Bogotas dhe Jerusalemit u tensionuan për shkak të kritikave të Petro-s ndaj operacionit ushtarak izraelit në Rripin e Gazës, ndërsa Kolumbia ndërpreu marrëdhëniet diplomatike me Izraelin. Presidenti i ri kolumbian, Abelardo de la Espriella, ka ndryshuar kursin e politikës së jashtme, duke rivendosur lidhjet me Izraelin dhe duke mbështetur hapjen e ambasadës në Jerusalem.
Cilat vende të tjera kanë ambasada në Jerusalem?
Përveç Kolumbisë, ambasada në Jerusalem kanë hapur edhe Shtetet e Bashkuara të Amerikës, Guatemala, Hondurasi, Kosova, Papua Guinea e Re, Paraguai, Fixhi, Nauru dhe Somaliland. Kështu, Kolumbia bëhet shteti i dhjetë në këtë listë. Megjithatë, shumica e vendeve të botës vazhdojnë t’i mbajnë ambasadat e tyre në Tel Aviv. Ato mbështesin qëndrimin se statusi përfundimtar i Jerusalemit duhet të përcaktohet përmes negociatave mes Izraelit dhe palestinezëve, të cilët gjithashtu e pretendojnë qytetin si kryeqytet./et