Last Updated on 18/10/2026 by Monika
Kandidatja e së djathtës ekstreme për zgjedhjet presidenciale të vitit 2027 ka reaguar një ditë pas trazirave që tronditën Francën, ndërsa grabitjet rifilluan në Paris.
“Po përjetojmë një krizë besimi”, deklaroi kandidatja për presidente, Marine Le Pen, duke e cilësuar situatën si “një kërcënim për demokracinë”. Udhëheqësja e Tubimit Kombëtar ia atribuoi përgjegjësinë së majtës ekstreme dhe presidentit Emmanuel Macron, të cilin e përshkroi si një lider “pa besueshmëri dhe autoritet”.
Le Pen foli më pak se dy orë përpara fjalimit të Macronit, i cili pritej të mbahej në orën 20:00.
Nga ana e tij, kreu i Tubimit Kombëtar, Jordan Bardella, deklaroi se “sot, në Francë, rendi nuk ekziston më”. Sipas tij, “Franca u poshtërua” gjatë natës së së shtunës. Bardella i bëri këto komente gjatë një vizite në një komisariat policie në Paris.
Dhuna shpërthen sërish në Paris
Reagimet e Marine Le Pen dhe Jordan Bardellës vijnë në një moment kur grabitjet kanë rifilluar në Paris, më pak se 24 orë pas një dite kaosi që tronditi vendin.
Të dielën pasdite, në kryeqytetin francez shpërthyen sërish episode dhune. Njësia speciale e policisë për ndërhyrje të shpejtë në trazirat urbane, CRS-8, është angazhuar për të dytën ditë radhazi.
Tensionet janë përqendruar sërish në zemër të Parisit, veçanërisht në zonën përreth sheshit Place de la République. Disa qindra protestues të dhunshëm janë përplasur me forcat e rendit.
Sipas prefekturës së policisë së Parisit, në rrjetet sociale ishte shpërndarë një thirrje e paregjistruar për grumbullim në Place de la République, të dielën në orën 14:00.
Grupe të rinjsh me kapuçë kanë sulmuar dyqane dhe kanë grabitur mallrat e tyre, duke rikthyer skenat e kaosit në kryeqytetin francez.
30 mijë grabitës në Marsejë vetëm të shtunën
Shifrat e publikuara për dhunën e së shtunës janë tronditëse.
Vetëm gjatë asaj dite, prefektura e Bouches-du-Rhône raportoi më shumë se 30 mijë persona të përfshirë në grabitje në Marsejë. Shifra e jashtëzakonshme ka lënë të habitur edhe ekspertët e specializuar në çështjet e policisë dhe drejtësisë./mxh