Pacientët në disa vende evropiane po përballen me vonesa të konsiderueshme për të marrë kujdes shëndetësor, sipas raportit “Shëndeti në një Vështrim 2025” të Organizatës për Bashkëpunim Ekonomik dhe Zhvillim (OECD).
Raporti tregon se më shumë se një në dhjetë pacientë në Mbretërinë e Bashkuar që kanë nevojë për konsultë me një specialist presin mbi një vit për të siguruar një takim. Ndërkohë, në Slloveni, pacientët presin mesatarisht 667 ditë, ose gati dy vjet, për një ndërhyrje të zëvendësimit të legenit.
Sipas OECD-së, vonesat e gjata në trajtim ndikojnë drejtpërdrejt në cilësinë e jetës së pacientëve, duke i detyruar ata të jetojnë më gjatë me dhimbje dhe paaftësi, ndërsa mund të përkeqësojnë edhe rezultatet shëndetësore pas ndërhyrjes.
Problemi nuk kufizohet vetëm te trajtimet specialistike. Edhe takimet me mjekët e përgjithshëm dhe infermierët shpesh kërkojnë pritje të konsiderueshme. Në Suedi, 23% e pacientëve presin më shumë se një javë për të vizituar një mjek ose infermier. Në Francë dhe Gjermani kjo shifër arrin në 20%, ndërsa në Mbretërinë e Bashkuar në 18%.
Kur përfshihen edhe ata që presin gjashtë deri në shtatë ditë, përqindjet rriten më tej: 30% në Suedi, 28% në Francë, 27% në Mbretërinë e Bashkuar dhe 26% në Gjermani.
Raporti nënvizon se kohët e pritjes mbeten një nga sfidat më të mëdha të sistemeve shëndetësore evropiane, megjithëse krahasimet mes vendeve duhet të interpretohen me kujdes për shkak të dallimeve metodologjike në mbledhjen e të dhënave./a.d