Policia e Shtetit ka hedhur poshtë pretendimet dhe lajmet e përhapura në rrjetet sociale se në radhët e saj janë angazhuar punonjës policie nga Serbia.
Sipas policisë këto pretendime janë të pavërteta dhe shfrytëzohen për të krijuar klimë konfliktuale dhe për të cenuar besimin e qytetarëve te Policia e Shtetit.
Në reagim theksohet pretendimi për angazhimin e punonjësve të policisë nga Serbia është tërësisht i pavërtetë.
“Policia e Shtetit shpreh keqardhjen për përhapjen e lajmeve të pavërteta në rrjetet sociale, përmes të cilave pretendohet se në radhët e saj janë angazhuar punonjës policie nga Serbia.
Përhapja e këtyre pretendimeve tërësisht të pavërteta dhe dashakeqe synon të shfrytëzojë ndjenjat nacionaliste për të krijuar klimë konfliktuale dhe për të cenuar besimin e qytetarëve te Policia e Shtetit.
Policia e Shtetit sqaron se në tubimin e datës 15.10.2026, ashtu si në çdo tubim tjetër, janë angazhuar vetëm punonjës të Policisë së Shtetit, të planëzuar në shërbim në bazë të planit të masave. Pretendimi për angazhimin e punonjësve të policisë nga Serbia është tërësisht i pavërtetë”, nënvizon Policia e Shtetit./k.m