Last Updated on 14/09/2026 by EL
Rikthimi i Celine Dion në skenë po ndikon edhe në turizmin e Parisit. Një hotel pranë Harkut të Triumfit ka krijuar një suitë të frymëzuar nga këngëtarja, me çmime që nisin nga 659 euro nata.
Këngëtarja Celine Dion po pushton Parisin jo vetëm me rikthimin e saj në skenë, por edhe me një valë të re turizmi të lidhur me koncertet.
Ndërsa kërkimet për fluturime drejt kryeqytetit francez janë rritur, një hotel në Paris ka krijuar një suitë tërësisht të frymëzuar nga këngëtarja kanadeze.
E quajtur “Paris, I’m Ready”, suita kushton nga 659 euro nata dhe përfshin elemente që rikrijojnë atmosferën para një koncerti, mes tyre një mur me mikrofona, pasqyra të ndriçuara dhe punime artistike të frymëzuara nga Celine Dion.
Hoteli ka krijuar gjithashtu eksperienca të tjera për fansat, nga aktivitete muzikore dhe gastronomike deri te një tur falas dyorësh në Paris, që përfshin Kullën Eiffel, Harkun e Triumfit dhe lumin Senë.
Nisma lidhet me fenomenin në rritje ku turistët ndërtojnë të gjithë udhëtimin e tyre rreth një koncerti.
Rikthimi i Celine Dion në Paris po tregon kështu se një koncert i madh mund të ndikojë jo vetëm në industrinë e muzikës, por edhe në fluturimet, hotelet dhe turizmin e një qyteti.
Koncerti i këngëtares në Paris është i pari pas një shkëputjeje prej 6 vitesh./et