Duke filluar nga shtatori, rregulla të reja do të riformësojnë debatet në seancat e hemiciklit të Parlamentit Europian, me qëllim që t’i mbajnë eurodeputetët në vendet e tyre gjatë seancës dhe të shndërrojnë mënyrën e zhvillimit të debateve dhe diskutimeve.
Gjatë javëve të gjata plenare të Strasburgut, shumë eurodeputetë mbërrijnë pak para kohës së tyre të fjalimit, mbajnë një fjalim njëminutësh të parapërgatitur mirë dhe largohen pothuajse menjëherë pas kësaj.
Ndërsa hemicikli është shndërruar gjithnjë e më shumë në një studio regjistrimi në vend të një dhome debati, Presidentja e Parlamentit Europian, Roberta Metsola, ka nxitur një rishikim ambicioz të punës plenare.
Qëllimi është që debatet të bëhen më dinamike dhe të zvogëlohet numri i vendeve bosh. Metsola beson se imazhet e stolave bosh minojnë pretendimin e Parlamentit për të mishëruar qendrën demokratike të Evropës, është shprehur një zyrtar i BE-së për Euronews.
Sipas sistemit aktual, debatet shpesh tejkalohen, duke e shtyrë axhendën e ditës deri në mbrëmje dhe duke dekurajuar pjesëmarrjen. Si rezultat, dosjet politikisht të ndjeshme mund të përfundojnë duke u debatuar para bankave pothuajse të zbrazëta, me vetëm folësit e planifikuar të mbetur në sallë.
Rregullat e reja prezantojnë orare fikse përfundimi për seancat plenare, duke krijuar një orar më të parashikueshëm dhe duke i dhënë fund mbrëmjeve maratonë që kanë përcaktuar prej kohësh javët e Strasburgut.
Reforma synon gjithashtu një nga arsyet kryesore pse eurodeputetët nuk marrin pjesë në debate. Takimet e grupeve politike dhe aktivitetet e tjera parlamentare, të tilla si negociatat me shtetet anëtare, nuk do të zhvillohen më paralelisht me diskutimet plenare.
Këto takime janë shumë të rëndësishme për eurodeputetët, sepse merren vendime të rëndësishme. Mbajtja e tyre jashtë orarit të debatit duhet ta bëjë pjesëmarrjen në seancën plenare më pak të kushtueshme dhe më të vlefshme.
Lista e folësve do të ndryshojë gjithashtu. Gjatë debateve të zgjedhura të profilit të lartë, eurodeputetët nuk do ta dinë më saktësisht se kur duhet të flasin. Në vend që të presin jashtë derisa të afrohet koha e tyre, ata do të kenë një nxitje për të qëndruar në sallë dhe për të ndjekur debatin.
Gjithashtu, eurodeputetët do të jenë në gjendje të bëjnë deklarata personale të menjëhershme kur një ligjvënës tjetër u referohet atyre drejtpërdrejt. Parlamenti gjithashtu dëshiron që eurodeputetët t’i përdorin më mirë “kartat blu”, një procedurë që u lejon anëtarëve t’i bëjnë një pyetje një folësi menjëherë pas një ndërhyrjeje./ad