Last Updated on 20/11/2026 by Anisa
Sot, më 20 nëntor, mbushen 13 vite nga ndarja tragjike nga jeta e Sokol Olldashit, një prej figurave të njohura të Partisë Demokratike dhe politikës shqiptare, i cili humbi jetën në një aksident automobilistik, në kulmin e karrierës së tij politike.
Ish-deputeti dhe ish-ministri ndërroi jetë më 20 nëntor 2013, në moshën 41-vjeçare, në aksin rrugor Elbasan–Tiranë, pranë Lapidarit. Lajmi për vdekjen e tij tronditi politikën dhe opinionin publik, duke ndërprerë papritur rrugëtimin e një prej figurave që kishte spikatur në radhët e demokratëve.
Sokol Olldashi ishte pjesë e lëvizjes studentore të Dhjetorit 1990, ngjarje që shënoi fillimin e ndryshimeve demokratike në Shqipëri. Përpara se të hynte në politikë, ai ndërtoi një karrierë në gazetari, duke punuar si gazetar dhe kryeredaktor i gazetës “Albania”.
Në vitin 2001 u zgjodh për herë të parë deputet në Kuvendin e Shqipërisë, duke nisur një karrierë parlamentare që do të shoqërohej me katër mandate. Në vitin 2005, pas rizgjedhjes si deputet, mori drejtimin e Ministrisë së Brendshme, detyrë që e mbajti deri në fillim të vitit 2007.
Më pas, Olldashi hyri në garën për Bashkinë e Tiranës, ku u përball me Edi Ramën, por nuk arriti të fitonte. Ai vijoi angazhimin në qeveri, duke marrë drejtimin e Ministrisë së Punëve Publike, Transportit dhe Telekomunikacionit, post që e mbajti deri në shtator të vitit 2013.
Pas humbjes së Partisë Demokratike në zgjedhjet parlamentare të 23 qershorit 2013 dhe dorëheqjes së Sali Berishës nga drejtimi i partisë, Olldashi kandidoi për kryetar të PD-së, përballë Lulzim Bashës. Gara për kreun e demokratëve ishte një nga sfidat e fundit politike të tij, përpara aksidentit tragjik që i mori jetën vetëm pak muaj më vonë.
13 vite më pas, emri i tij vijon të kujtohet në politikën shqiptare, ndërsa edhe familja e tij mbetet e lidhur me jetën publike. Djali i madh, Glauku, ka nisur të shfaqet në aktivitetet e Partisë Demokratike dhe në protesta të opozitës, duke rikthyer vëmendjen te trashëgimia politike e të atit.
Sokol Olldashi ishte i martuar me Enkeleda Olldashin dhe la pas dy djem, Glaukun dhe Kleitin.
Në këtë përvjetor, kujtimi i tij rikthen në vëmendje një jetë të ndërprerë herët, një karrierë me disa poste të rëndësishme dhe një emër që mbetet pjesë e historisë së Partisë Demokratike dhe politikës shqiptare./ad
