Tensionet mes Japonisë dhe Kinës po rriten, pasi forcat ajrore ruse dhe kineze kryen një patrullë të përbashkët pranë territorit japonez. Ministria e Mbrojtjes në Tokio njoftoi se avionët luftarakë japonezë u ngritën për të monitoruar aktivitetin, duke e cilësuar operacionin si një demonstrim force kundër vendit.
Sipas autoriteteve japoneze, dy bombardues strategjikë rusë Tu-95, të aftë për mbajtjen e armëve bërthamore, u bashkuan me dy bombardues kinezë H-6 në një fluturim të gjatë mbi Paqësor.
Katër avionë luftarakë kinezë J-16 iu bashkuan misionit, duke fluturuar mes ishujve Okinawa dhe Miyako, në një zonë të klasifikuar si ujëra ndërkombëtare, shkruan Reuters.
Në të njëjtën kohë, Japonia raportoi aktivitet paralel të forcave ajrore ruse në Detin e Japonisë, përfshirë një avion paralajmërues A-50 dhe dy Su-30. Ministri japonez i Mbrojtjes, Shinjiro Koizumi, deklaroi se operacionet ruso-kineze janë “një shfaqje force e qartë kundër kombit tonë” dhe përbëjnë një shqetësim serioz për sigurinë kombëtare.
Agjencitë ruse raportuan se fluturimi i përbashkët pranë Japonisë zgjati tetë orë. Ndërkohë, ushtria e Koresë së Jugut konfirmoi se shtatë avionë rusë dhe dy avionë kinezë kishin hyrë në zonën e saj të mbrojtjes ajrore.
Ky zhvillim vjen pas një incidenti të fundit, kur avionë luftarakë kinezë të nisur nga aeroplanmbajtëse kishin drejtuar radarët ndaj avionëve ushtarakë japonezë, një pretendim që Pekini e mohoi. Veprimet ushtarake të Kinës pranë Japonisë pasojnë deklaratën e kryeministres japoneze Sanae Takaichi, e cila paralajmëroi se Tokio mund të përgjigjej ndaj çdo veprimi ushtarak kinez kundër Tajvanit që kërcënon edhe sigurinë japoneze.
Kina dhe Rusia kanë intensifikuar bashkëpunimin ushtarak vitet e fundit, duke kryer stërvitje të përbashkëta kundër raketave në territorin rus dhe manovra detare me municion real në Detin e Kinës Jugore./kb
