Departamenti Amerikan i Drejtësisë njoftoi të martën se ka ngritur padi penale kundër katër anëtarëve të dyshuar të një karteli të fuqishëm meksikan të drogës, duke i akuzuar për përpjekje për të blerë armë dhe municione në Republikën Çeke.
Katër burrat, të cilët sipas Uashingtonit janë anëtarë të kartelit Jalisco New Generation (JNG), një nga bandat më të fuqishme në Meksikë, u arrestuan në Republikën Çeke në qershor.
Dy prej tyre janë ekstraduar tashmë në SHBA, ndërsa dy të tjerët pritet të ekstradohen së shpejti, thanë zyrtarët e Departamentit Amerikan të Drejtësisë.
Ata akuzohen për trafik droge dhe armësh, si dhe për krime të tjera. Nëse shpallen fajtorë, ata përballen me burgim të përjetshëm.
Sipas Departamentit Amerikan të Drejtësisë, të dyshuarit kërkuan të siguronin një sasi të madhe armësh dhe municionesh në Republikën Çeke, me qëllim kryerjen e “krimeve të dhunshme kundër karteleve të tjera, civilëve, policisë dhe personelit ushtarak” në Meksikë.
Armët që ata kërkuan përfshinin pushkë automatike, granatahedhës dhe mortaja. Në këmbim, ata ofruan fentanil ose metamfetaminë, droga që më pas do të importoheshin në SHBA.
Departamenti Amerikan i Shtetit nuk i identifikoi furnizuesit e dyshuar të armëve me të cilët meksikanët kishin arritur një marrëveshje.
Javën e kaluar, sistemi i drejtësisë amerikane njoftoi ndjekjen penale të anëtarëve të lartë të KNGX dhe rritjen e shpërblimit që ofron për informacionin që mund të çojë në arrestimin e udhëheqësve të bandës, deri në 100 milionë dollarë.
Ky kartel, i cili akuzohet se ka krijuar një rrjet global, veçanërisht të dhunshëm, për trafikun e fentanilit, kokainës, heroinës dhe metamfetaminës, është përshkruar nga administrata e Presidentit Donald Trump si një organizatë ndërkombëtare “terroriste”./ad